YMA in Kumpuan an hawng

Kum 2025-2027 chhunga YMA Kumpuan ‘Ruihhlo Do’ hawnna chu nizan hmasa khan neih niin Central YMA President R. Lalngheta chuan ruihhlo zuartute chu eizawnna dang lo ngaihtuah turin a chah.

Aizawl Vanapa Hall-a YMA Kumpuan hawnna hunah hian Central YMA President R. Lalngheta chuan, “Zanin atangin khawlai a kan unaute thle mai mai riahna tur tha neilo te Central YMA kumpuan ten hma la tanin TBCC ah dah thlak tan leh a ni ang,” a ti a. Ruihhlo do chu a sawt tih a taka an hriat thu sawiin, “Pa fa inbe thei tawhlo te in ngai taka an han awmho/inkawm leh te hmuh hian a hlawhtlin zia kan hmu, ruihhlo ngai te diriam lovin, an tana tha turin YMA hruaitute ruihhlo ngaite chhanchhuak turin kan puanven i sawi chhing ila, fimkhur tak leh dik takin Ruihhlo i do tlang ang u. Dan chunga leng kan ni lo tih erawh hre thar ila. Dik tak leh huai takin Ruihhlo i do ang u, Ruihhlo kan do hi kan thawk thlawn lo. A la ti ve lo ten an tih loh nan inzirtirna tam zawk kan neih a ngai a ni,” a ti bawk.

Central YMA President chuan ruihhlo zuartu te chu mi chhungkua nasa takin an tibuai tih hrilhin, “Zanin atang hian in ruihhlo zawrh lo sim tur leh eizawnna dang lo ngaihtuah tur in ka chah che u a ni,” a ti a. “Zanin a lo kalkhawm te pawh awm mai mai thei kan ni lo,” tiin theihtawp chhuaha Ruihhlo do turin kalkhawm te a chah bawk a ni.

Nizan hmasaa YMA Kumpuan ‘Ruihhlo Do’ hawnna Inkhawm hi Central YMA Vice President Prof. Lalnuntluanga chuan kaihruaiin General Secretary, Prof. Malsawmliana chuan kumpuan chungchang inhriattirna hun a hmang bawk a. Ruihhlo ngaite enkawlna neitu Lalruatpuii, Founder Operation Kingdom Ministry (OKM) leh TT. Zohmingthanga, Tawngtai Bethel Camping Centre (TBCC) te hnenah chawimawina thuziak hlanin Lalsangliana (Taitea), Youth Icon chu mipuite ruihhlo that lohna zirtir kawnga hma la tura Palai (Ambassador)-ah an ruat bawk.