Mipuiin MNF aiin Congress an duh zawk niin sawi

MPCC Spokesperson leh General Secretary Dr. Lallianchhunga kum 2028-a ZPM sawrkar thlak turin mipuiten MNF aiin Congress an duh zawk niin a sawi.

    Mizoram Pradesh Congress Committee (MPCC) hian nimin khan Aizawl-a Congress Bhavan Golden Hall-ah Political Session neiin he hunah hian MPCC Spokesperson Dr. Lallianchhunga chuan, “ZPM Enchhin sawrkar kan hrawn mek hi Mizoram-a sawrkarna siam tawh zingah mipuiin an nin hma ber sawrkar a ni,” tiin “Kum 2028 inthlanpui a ZPM thlak tur hian mipuiten MNF aiin Congress hi min duh zawk a. A chhan chu, MNF a sawrkar leh palh chuan sawrkar hnathawkte’n a hun takah hlawh an la thei lo leh anga, Mizo Nationalism aiin Kamrul-a Contract thawh tur an buaipui leh zawk anga, politics hmanga Hindu sakhua sawhngheh tumtu Central BJP tha ti chak turin hma an la leh dawn tih Mizoram mipuite hian an hria a ni,” a ti a. “Kum 2018-2023 chhung khan an intiamna tihhlawhtlin an nei lo. Nuai thum min tiam a, Traffic jam awm lohna khawpui min tiam a, kawng chhawng min tiam bawk a. Hengte hi tihhlawhtlin an nei lo. Kum 2028 inthlanpui kan hmachhawn turah MNF te hian inzawrhna tur engmah an nei tawh lo a ni,” a ti bawk.