LADC Inthlanpui vawi 12-na ah party mal-a sawrkar siam thei khawpa chak an awm lo

Lai Autonomous District Council (LADC) Inthlanpui vawi 12-na a Vote tla te chu nimin khan tluang taka chhiar niin MDC Seat 25 awm-ah Party mal-a sawrkar siam thei khawpa chak an awm lo a, MNF Party chu Party mal-a Seat la tam ber an ni bawk.

Tun thla ni 3-a LADC Inthlanpui vawi 12-na a Vote tla te hi nimin zing dar 8:00 atang khan Govt. Lawngtlai College a Counting Centre-ah chhiar a ni a, MNF Party chu Party mal-a Seat la tam ber niin MDC Bial 25-a inthlanna ah Seat 8 an la a, Indian National Congress (INC) in Seat 7 lain ZPM Party in Seat 6 an la a, BJP in Seat 2 an lak bakah Independent candidate ten Seat 2 an la bawk. MLA nilai C. Ngunlianchunga chu Lawngtlai Vengpui Bial-ah thlantlin niin CEM nilai N. Zangura leh Chairman nilai VL. Hmuaka te erawh an tling zo lo thung a ni.

LADC Inthlanpui-a MNF Party in hnehna an channa te hi Sangau South, Lungtian, Bualpui West, Lawngtlai Bazar, Lawngtlai Chandmary, Lawngtlai College Veng, Lawngtlai-III leh Diltlang South te an ni a, INC Seat lak te hi Lungpher South, Lawngtlai Vengpui, Chawngte P, Sakeilui, M. Kawnpui, Sakulh leh Tuithumhnar te niin ZPM in hnehna an channa te hi Cheural, Vawmbuk, Bualpui East, Council Veng Lawngtlai, Lawngtlai AOC leh Bungtlang South te an ni a. BJP in Sangau East leh Sangau West-ah hnehna changin Paithar Bial leh Vathuampui Bial-ah te Independent Candidate thlantlin an ni bawk.

ZPM party chuan nimin khan thuchhuah siamin LADC Inthlanpui-a thlantlin tak MDC te an lawmpui thu leh candidate tling ve ta lo te an tawrhpui thu an sawi a, MDC thlantlin te chu MDC tha tak ni tur leh Lai District hmasawnna tura theihtawp chhuaha thawk turin duhsakna an hlan a, “Tun tumah hian ZPM chu Seat la tam ber ni lo mah ila; kum 2020 LADC inthlanpui atanga kan party hmasawnna hi lawmawm kan ti,” an ti bawk.

MNF Party pawhin Lai Autonomous District Council inthlan result puan takah MNF chuan Bial la tam berin chak ber nihna an chang tih sawiin, “LADC-ah MNF kaihhruai sawrkar nghet leh chak tak a din ngei MNF chuan a duhin a beisei a ni,” an ti a. LADC inthlan result chuan sawrkar dinglai ZPM mipuiin an rin tawk tawh lohzia a tarlang chiang hle niin an sawi bawk.