MUHCS atangin damlo 55,483 enkawlna pe tawh

Mizoram sawrkarin damlote chhawmdawlna atana Healthcare Scheme a duan, Mizoram Universal Healthcare Scheme (MUHCS) hmangin damlo 55,483 enkawlna senso pek a ni tawh a; MUHCS kalpuitu damdawi On hrang hrangte hnenah sawrkarin damlo an enkawlna bill atan cheng vbc. 86.65 a pe tawh a ni.

Mizoram State Healthcare Society (MSHCS) hotute sawi danin, kumin April thlaa MUHCS kalpui anih atanga tun thla, December ni 3 thleng khan MUHCS kalpuitu damdawi In te hnenah MSHCS chuan damlo enkawlna senso rulh nan pawisa an pe tawh a, pawisa an pek tawh zawng zawng hi avaiin cheng vbc. 86.65 niin, heng pawisa hi MUHCS kalpuina damdawi In hrang hranga damlo 55,483-te enkawlna bill a ni. 

Mizoram chhungah MUHCS kalpuitu Empanelled Private Hospital 13 leh Empanelled Private Day Care Centre pathum a awm a; Aizawl District-ah MUHCS kalpuitu mimal damdawi In 5 awmin a tam ber a, Lunglei District-ah damdawi In 3 awmin, Champhai leh Lawngtlai District-ah damdawi In 2 ve ve leh Siaha District-ah damdawi In pakhat a awm mek bawk.

MUHCS kalpuitu Empanelled Private Day Care Centre pathum pawh hi Aizawl khawpuia mite an ni a; Mizoram pawnah MUHCS kalpuitu damdawi In, Empanelled Hospital 25 leh Deemed Empanelled Hospital 13 a awm mek bawk a ni.