Mizo Diaspora Cell (MDC)-in ramdang a hna thawk turte Dan te tha taka zawm turin an ngen

Chief Minister’s Office-a din Mizo Diaspora Cell (MDC) chu Zirtawpni khan thukhawmin an hmalakna hrang hrang an thlir bakah hma an lak zel dan turte an sawiho.

CM Conference Hall-a Mizo Diaspora Cell (MDC) thutkhawm hi an Chairman, Commissioner & Secretary to Chief Minister Vanlaldina Fanai ICAS chuan kaihruaiin MDC hnena thlen tawhte an thlirlet a, rampawn-a case an neih langsar zualte chu Dubai, Maldives, Nepal, China leh Malaysia-ah te niin tam tak chu Passport lem hmanga Myanmar kaltlanga ramdanga dan lova hna thawka kalte an nih thu tarlan a ni a. Hei vang hian MDC chuan Mizoram atanga hnathawk tur emaw, sumdawng tur emaw te chuan India dan leh an tlawh tur ram Dante tha taka zawm turin a ngen thar leh a ni. Hei bakah hian tanpui ngaiten awlsam taka thu an thlenna tur te, an thu thlente rang zawka dawnsawn theihna tur te, Best practices-te leh ramdanga thawk turte tih tur leh tih loh tur (Do’s and Don’ts) te leh thil tangkai dang in hrilhriat nan Social Media Platforms hman uar an rel a ni.

He huna tarlan a nih danin Mizo DiasporaHub-ah hmun hrang hranga Mizo Welfare Association 40 chu an inziaklut tawh a, an zinga pahnih chu India ram pawna mi an ni a. Heng Association-te nen hian online Meeting neih rawt a ni a, tam zawk an inziahluh theih nan hmalak dan tur pawh an sawiho nghal bawk a ni.