Ni 2 awh tur ‘Mizoram Buyer Seller Meet 2025’ nei

Nimin khan Aijal Club-ah ‘Mizoram Buyer Seller Meet 2025’ chu neih niin Agriculture & Farmers' Welfare Department Minister PC. Vanlalruata chuan khuallian niin a hmanpui a ni.

Mizoram Agricultural Marketing Board (MAMB), International Fund for Agriculture Development (IFAD) leh Mission Organic Mizoram tangkawp buatsaih ‘Mizoram Buyer Seller Meet 2025’ ah hian Agriculture Minister chuan Mizoram-a kuthnathawktute tih hmasawn leh an dinhmun chawikan nana indawrtawnna tha siam sak an nih theih nan Mizoram Agricultural Marketing Board (MAMB) chu din a nih thu sawiin, Mizoram-a tharchhuah Sawhthing, Aieng, Mizo Hmarchate leh Hmunphiah te pawh hmun zau zawka hralhchhuah mek zel a nih thu a sawi a. MAMB hmalakna leh kuthnathawktute thawhrimnaten hlawhtlinna an hmuh theih nana pawimawh tak chu thlai thar leichhawngtu tha leh rintlak neih a nih thu sawiin, chutiang ‘Buyer’ tha kan neih theih nan Buyer Seller Meet hi buatsaih a nih thu leh indawrtawnna tha a hrin chhuah ngei a beisei thu a sawi a ni.

Minister PC. Vanlalruata chuan Aizawl chu Rel hmanga thlunzawm a nih tawh avangin insumdawntawnna pawh nasa zawka kalpui theih a nih tawh thu a sawi a. Chutihrual chuan State dangte el pha leh midang aia thlai hrisel, thianghlim leh itawm zawk tharchhuak turin tanlak a pawimawh thu a sawi a. Bana Kaih Scheme kaltlangin Sawhthing lei nan cheng vbc. 137 hman a nih thu tarlangin, Mizoram Sawhthing chu hlo Tur tel lo, ‘Organic’ taka enkawl a nih avangin ngaihhlut a hlawh chhoh zel a beisei thu a sawi bawk.

Khual zahawm Horticulture Minister C. Lalsawivunga chuan Agriculture leh a kaihhnawih thlai leh thei, man man zawka tihral dan tur tha ruahmanna tura ‘Buyer Seller Meet’ buatsaih a ni chu lawmawm a tih thu a sawi a, Adviser to Chief Minister (Hand holding) Dr. KC. Lalmalsawmzauva pawhin Kuthnathawktuten an thawh hah man dik tak an hmuh theih nan indawrtawnna rintlak siam a pawimawh thu a sawi bawk.

Mizoram Buyer Seller Meet 2025 hawnna hun ah hian Planning & Programme Implementation Department Secretary Lalmalsawma Pachuau chuan Mizoram Sawrkar Flagship Program Bana Kaih Scheme nihphung tlangpui tarlangin, thlai thlan bik, Sawhthing, Aieng, Mizo Hmarchate leh Hmunphiah tihralna kawnga Sawrkarin tanpuina a pek dan a sawifiah a. IFAD Consultant Hanisha Vaswani chuan Mizoram-a thlai leh thei tharchhuah leh man man zawka tih ral kawnga hmalak theih dan a tarlang bawk a ni. Buyer Seller Meet 2025-ah hian State pawn atanga ‘Buyer’ inziaklut mi 40 vel awmin Mizoram-a tharchhuah thlai, thei leh a kaihnawih chi hrang hrang phochhuahna Stall 50 a awm bawk a ni.