BCCI hnuaia inelna ah Mizoram Cricket Team te an Champion

Pune-a 2025-2026 Syed Mushtaq Ali Trophy (Plate Group) Final khelhah Mizoram chuan Sikkim hnehin an champion.

He inelna hi Board of Control for Cricket in India (BCCI) hnuaia inelna niin Twenty20 inelna a ni a, Mizoram awmna Plate Group-ah hian Mizoram bakah Arunachal Pradesh, Manipur, Meghalaya, Nagaland leh Sikkim te an awm a. Mizoram Team hian Group Match an khelh ah Sikkim tih loh chu hneh vekin Inrinni khan Final-ah a hmaa an hneh loh Sikkim hi an hmachhawn leh a, run 10-a hnehna changin an Champion a, Plate Group atangin Season thar a Elite Group-a khel turin an tling ta a ni.

MCA Cricket Stadium, Gahunje, Pune a Final khelh ah hian Toss-a chak Sikkim in vuak hmasak thlangin Mizoram hian Overs 20-ah run 148 siamin Wicket 9 an hloh a, hei hi Sikkim in um ve lehin Overs 20-ah run 138 siamin Wicket 7 an hloh a, Mizoram run siam hi an umphak theih tak loh avangin Mizoram hi run 10 in an chak ta a ni. Kumin hi Cricket-ah Mizoram tan kum tha tih theih niin Women’s Under-19 T20 Trophy Plate-ah an lo champion tawh bawk a, BCCI hnuaia inelna ah Mizoram hian Trophy pahnih lain Season thar-ah inelna sang zawk, Elite Group khel turin an tling ve ve a ni.

Chief Minister Lalduhoma chuan Social Media kaltlangin Mizoram team te a lawmpui thu a sawi a, Mizoram infiamna chanchin ah Mizoram chu bung thar an kai pui tih sawiin. India ram infiamna ngaihhlut hlawh ber Cricket huanga Mizoram Team ten nasa taka hma an sawn chu lawmawm a tih thu sawiin, Cricket Association of Mizoram leh Sports & Youth Services te hna-thawh chu ropui a tih thu a sawi a. Sports Minister Lalnghinglova Hmar pawhin 2025-2026 Syed Mushtaq Ali Trophy (Plate Group)-a Mizoram an champion thei chi a lawmpui thu leh a chhuan takzet thu a sawi bawk a ni.