Zirtirtu aikal la la awm MSU in an hrethiam lo

Mizo Students’ Union (MSU) General Hqrs. President B. Lalkhawngaihzuala chuan Zirtirtu aikal tihtawp tuma sawrkarin theihtawp a chhuah chung pawh a Zirtirtu mi 14 lai mai aikal la an lo la awm chu MSU chuan a hrethiam lo tih ‘MSU Cup 2026 Football’ kharna nimin a neih a hmanpuina ah a sawi a. Heng hi te hi dan anga hrem an nih theih nan hma an lak thu sawiin, zirna siamtha turin tha lo lai awm an hriat chuan engtik lai pawha MSU hnenah complain siam hrehlo turin he huna kalkhawm te chu a chah a. MSU chu zirlaite tan thawk an nih thu pawh sawiin, Zirlaite tihhmasawnna turin Co-Curricular Activities hrang hrang an huaihawt thin thu a sawi a. Hemi bakah hian kan ram zirna siamtha tura theihtawp an chhuah thu a sawi bawk.

MSU Silver Jubilee lawmna puala buatsaih ‘Inter College MSU Cup Football Tournament’ hi nimin khan Final khelh niin Final-ah hian Govt. Hrangbana College leh Govt. J.Thankima College te inhmachhawnin Govt. Hrangbana College ten hnehna an chang a, tun thla ni 29-a MSU Silver Jubilee lawmna ah lawmman semna neih a ni ang.