PMUY hnuaia LPG Connection chungchang sawiho

Pradhan Mantri Ujjwala Yojan (PMUY) hnuaia Gas Connection dilna tam tak tih khawtlai (pending) emaw, hnawl emaw a nih chhan leh hemi a hmalak dan tur chu niminpiah khan sawiho a ni.
Serchhip District Ujjwala Committee thut-khawm hi niminpiah khan Serchhip DC Meeting Hall-ah neih niin Serchhip District Civil Supplies Officer (DCSO) R. Zirliana chuan Pradhan Mantri Ujjwala Yojana (PMUY) kalpui dan tarlangin, Scheme Guideline-in a sawi anga Gas Connection la nei miah lo chhungkuate chauh he scheme hian a huam avang leh dilna thehlutte zingah Gas Connection nei sa tam tak an awm avangin dilna tam tak chu hnawl emaw, tih khawtlai emaw a nih thu a tarlang a. Harsatna dang sawilan zingah tunhnaia Iran leh a chhehvel buaina avanga LPG khaihlak hlauhthawnna a len thu te, hei vang hian Connection thar dil duhtu a tih tam hluai thu te, server-in a tlin loh phah hial thin thute a tel a. Heng bakah hian Consumer thenkhatte, an khua a an let hnua biakpawh hleih theih loh leh koh chhuah hleih theih loh an awm thinte chuan hna a tih khawtlai thin thu a tarlang bawk a ni.

He hunah hian PMUY hnuaia e-KYC tih hun tura ruat chu March 31, 2026 thleng a nih thu pawh tarlan niin Mizoram-ah ti hman lo tam tak an la awm avangin State Sawrkar chuan Ministry-ah hun pawhsei (extension) dilna a thawn tawh a, chak zawka hmalakna kalpui a nih theih nan April thla chawlhkar lina (4th Week of April) atang hian PMUY beneficiaries-te tan 'Physical Verification' kalpui tum a nih thu tarlan a ni bawk.