March thla chhungin Mizoram Police Eastern Range huamchhungah ruihhlo man a tam

Kumin (2026) March thla chhung khan Mizoram-a khawchhak lam District pali-ah ruihhlo chi hrang hrang Rs. 332,325,150/- hu zet man niin thubuai 14 ziahluh a ni.
Mizoram Police ten thuchhuah siama an tarlan danin kumin March thla chhung khan Mizoram khawchhak lam District pali (Eastern Range)- Champhai, Khawzawl, Serchhip leh Saitual District-ah te ruihhlo leh a kaihhnawih tam tham tak man a ni a, hemi hun chhung hian Heroin kg. 5.15396 man niin Rs. 103,079,200/- man ni a chhut a ni a, hemi kaihhnawih ah hian thubuai 9 ziahluh niin India mi 6 leh ramdang mi 4 man an ni bawk. March thla chhung vek khan Methamphetamine kg. 15.28 zet manin Rs. 122,120,000/- man nia chhut a ni bawk a, hemi kaihhnawih ah hian thubuai 3 ziahluh niin India mi pathum leh ramdang mi pahnih man an awm bawk.

March thla chhung vek khan heng District pathum-ah hian Ganja kg. 5.519 manin Rs. 275,950/- man nia chhut a ni a, thubuai pakhat ziahluh niin mi pakhat man a ni a, Morphine pawh kg. 10.685 manin Rs. 106,850,000/- man nia chhut a ni a, thubuai pakhat ziahluh niin mi pahnih man an ni bawk. Heng Ruihhlo chi hrang hrang an man te hi a vaiin Rs. 332,325,150/- man nia chhut a ni a, thubuai 14 ziahluh awmin mi 18 man an awm a, an zinga 12 chu India mi niin midang 6 hi ramdang mi an ni bawk. Heng Ruihhlo an man thubuai 14 zinga 7 hi Champhai District-a ziahluh niin Saitual District-ah 6 ziahluh a ni a, Serchhip District-ah pakhat ziahluh a ni bawk.

Mizoram Police thuchhuah chuan hetianga ruihhlo man hian ruihhlobeihna kawnga Mizoram Police hmalakna leh thawhrimna chiang taka a tarlan rualin nasa lehzuala ruihhlo dona kawnga hmalak a tul zia a tarlang chiang hle tih an tarlang a. Ruihhlo leh dan phal loh thil dona kawngah tha thlah lovin Mizoram Police chuan theihtawp an chhuah zel dawn tih pawh tarlangin, “Kan ram leh hnam himna tura Sawrkar, VC, YMA leh NGO hrang hrang tanghovin ruihhlo do beihpui kan thlakna ah neitu chan changa he kan hnam hmelma lian tak hi min dopui turin Zoram mipuite kan sawm tak zet a ni,” an ti a. “Thuneitute hnena misual leh ruihhlo tawlh report kawngah te tan la thar a, thahnem ngai taka theihtawp min chhuahpui zel turin kan inngen tak meuh meuh a ni,” an ti bawk.