ASF hri a len hriat a ni rih lo

Tun dinhmunah Mizoram-ah Vawk pul hri, African Swine Fever (ASF) a len hriat a ni rih lo a, khawi lai hmunah erawh vanduai thilthu a thihpui an awm thung.
ASF hri hian Mizoram a chenchilh tawh avangin khawiah emaw chuan a langchhuak ve reng tih AH & Vety Department hotute chuan an sawi a, tun dinhmunah State pawn atanga a lo luh leh luh loh finfiahna pawh a awm rih lo tih an sawi bawk a. Zawhna chhangin AH & Vety Director Dr. Lalrotluanga Sailo chuan African Swine Fever (ASF) in kum 2021 March thla a Mizoram a luhchilh hnuin kumtin ASF pul hri avanga vawk tam tak an thih bakah engemawzat suat an ni thin a, ASF hian Mizoram-ah bu a khuar tawh avangin vawk chauh nilo sanghal engemaw zat in an thihpui tawh a, Sanghal te chu ramhnuai a cheng an ni a, ASF an kai tawh chuan Vawk vulh te tan an hlauhawm hle bawk tih a sawi a ni.

Hei bakah hian kum 2026-a ASF lo lang leh chu State pawn atang Vawk lakluh vang ni lovin Mizoram-a hrik awmsa niin a lan thu a sawi a, tunhnaia Durtlang-a ASF avanga vawk thi nemngheh te pawh a hri a len rih loh vangin vanduai ve nawlh a ngaih a nih thu a sawi a, tun dinhmunah State thenawmah te ASF hi a leh hriat a ni lo tih a sawi bawk a ni.

AH & Vety Department hotute sawi danin kumin January thla tir atanga April 1, 2026 thleng khan Mizoram-ah ASF vang hian Vawk 133 thi tawhin Vawk pulhri darh zel tur venna atan Vawk 32 suat a ni tawh bawk a. Vawk pulhri leng avang hian Serchhip District leh Aizawl District-ah Vawk thi report leh Vawk suat a awm a. Serchhip District-ah chuan khawpui chhung – Chanmari, P&E Veng leh Kawnpui North-ah ASF hri hi hmuh a ni tawh a, Aizawl-ah chuan Durtlang Leitan Ramthar leh Durtlang Suaka Veng-ah ASF hri hi hmuh a ni thung a. Serchhip-ah hian Vawk 38 a thi tawh a, Durtlang-ah hian Vawk 2 a thi tawh bawk a, tunkar khan Serchhip P&E Veng leh Kawnpui North-ah hian Vawk 12 ve ve a thi nia chhinchhiah a ni.