Sainik School Chhingchhip atangin IAF Fighter Pilot-ah

April ni 8, 2026-a UPSC in National Defence Academy (NDA) and Naval Academy (II), 2025 Final Results a tihchhuah ah Sainik School Chhingchhip atangin Agastia Thapa, Bawngkawn chu All India Merit list-ah AIR 400-na a ni a, Indian Air Force-ah Fighter Pilot turin a tling.
Agastia Thapa hi Suraj Thapa (L) fapa niin Bawngkawn Biak In Mual-a cheng an ni a, KG 1 ttanga Class V thleng Jehova Jireh English Medium School, Bawngkawn-ah kalin Class VI atanga Class XII chu Sainik School Chhingchhip (SSCC)-ah a lut a. SSCC atang hian he Exam-ah hian mi pali in Written leh SSB an paltlang a, vanduaithlak takin midang erawh Medical leh Merit lamah an tling zo lo a, a tawp thlenga la tling awmchhun a ni.

Indian Air Force Fighter Pilot ni tur hian UPSC buatsaih Written Examination paltlang hnuah Air Force Selection Board (AFSB) paltlang leh a ngai a. Chumi hnuah Computer Pilot Selection System (CPSS) Test leh Medical Fitness Test paltlang leh a ngai bawk a. Hetia Exam a paltlang hnu hian National Defence Academy (NDA), Khadakwasla-ah kum thum a training anga, Air Force Academy (AFA), Hyderabad-ah kum khat a training leh hnuah Indian Air Force-ah Flying Officer rank atanga bul tanin Officer hna hi a zawm dawn a ni.