Kum upa, nu leh pa te hamthatna dan zirho a ni

Nimin khan Aijal Club-ah nu leh pa leh upa ten dan hnuaia dikna chanvo an neih leh hamthatna an hmuh theihte zirhona neih a ni.

Social Welfare, Women & Child Development Department leh Regional Resource & Training Centre for Senior Citizen tangkawp buatsaih ‘Maintenance & Welfare of Parents & Senior Citizens Act, chungchang zirhona ah hian Maintenance & Welfare of Parents & Senior Citizen Act 2007-in a phut angin, dan kengkawh tura din Appellate leh Maintenance Tribunals member, District hrang hrang atangin D.C, S.P, SDPO leh thawktu dang hemi kaihhnawih hrang hrangte kohkhawm an ni a, MUP, MHIP, YMA, MKHC leh NGO dangte sawm an nih bakah department officials leh staff te an tel bawk a ni.

He dan hnuaiah hian upa kum 60 chunglam enkawltu neilo te chu an fate emaw, fa neilo chu an chhungte emaw an ro khawmtu in an enkawl tur a ni a. He dan hmang hian fa ten an enkawl loh nu emaw pa te/chhungte/rokhawmtu chu action lak sak theih an ni a, a enkawl duhlo tu an fa te/chhungte/rokhawmtu chu thla khata cheng 10000/- thleng an nu leh pa te/pi leh Pu/chhungte/ro an khawm sak te chu in enkawlna tur pek tir theih a ni. Tin, inlaichinna awmlo mahse, rokhawm saktu in a rokhawm saka kha a enkawl duh leh si loh chuan, kha ro kha lak let sak theih a ni a. District tinah Tribunal hi din tur a ni a, hetah hian complaint hi thehluh theih a ni.

Nimin-a zirhona hun hi Social Welfare, Women & Child Development Department-a Joint Secretary Zonunthari chuan kaihruaiin Elderline Programme Manager Lalbiaksanga chuan Elderline chungchang sawiin, kum upa tanpui ngai chuan phone number 14567-ah an biak chuan an lo tanpui theih reng thu a sawi a. He huna tel te hi T. Lalnunsiama, Advocate chuan he Dan chungchang hi a zirtir bawk a ni.