District pali-a sawrkar hnathawk ten training nei

Mizoram chhim lam District pali – Lunglei, Siaha, Lawngtlai leh Hnahthial te tana Office inenkawl dan leh sum vawn dan zirhona chu nimin khan Lunglei Serkawn-a BCM Hall-ah neih a ni a, Vawiin-ah chhunzawmin zawhfel a ni ang.

Administrative Training Institute (ATI), Mizoram in an buatsaih ‘Special Training on Functional Efficiency in Establishment and Accounts Matters’ hi ATI Director Rita Lalnunmawii Pachuau chuan kaihruaiin ATI-in Lunglei-a kalchilha training a buatsaih chu Southern Zone District 4 huamchhunga sawrkar hna thawk, hmun hla zawka training kal harsatte tana ruahman a nih thu a sawi a. Course Director leh ATI Deputy Director (Training) Lalbiakenga chuan he training hi April ni 2 atanga 8, 2026 chhunga kalpui mek, SADHANA (Strengthening Adaptive Development and Humane Aptitude for National Advancement) Saptah – National Learning Week puala huaihawt a nih thu a sawi a. National Learning Week-in a tum ber chu sawrkar hnathawkte'n mahni hna theuh leh mawhphurhnate thiam bel tak leh hnemhnanpuiawm zawka an thawh theih nana mahni hna leh ni tin khawsaknaa hman tangkai theih tur zir belh a nih thu a sawi bawk a ni.

He Training hmanpuitu Lunglei Bawrhsap Navneet Mann chuan sawrkar hna thawkte chu sawrkar tha siamna atana hmanraw pawimawh an nih thu leh tha taka hna thawk thei turin tunlai hmasawnna mila intahhriam reng a tul thu a sawi a. Sawrkar laipuiin iGOT Karmayogi kaltlangin sawrkar hnathawkte'n an thiamna an tihpun leh an tahhriam zelna tur ruahmanna a kalpui tih sawiin, chumi tihhlawhtlinna peng khat atana ATI in sawrkar hna thawkte thiam tur pawimawh hrang hrang zirhona hun a buatsaih chu lawmawm a tih thu a sawi bawk.

He Training-ah hian sawrkar hnathawk – Group A, Group B leh Group C te telin, Lunglei District atangin mi 80, Siaha District atangin mi 21, Lawngtlai District atangin mi 30 leh Hnahthial District atangin mi 25, an vaiin mi 156 an tel a. Sawrkar hna thawkte'n ni tin Office hna an thawhnaa an hman tur Rules tangkai tak tak – FRSR, CCS (CCA) Rules, Conduct Rules/Leave Rules, DPC Procedure, Service Book, Probation & Confirmation, Basic Accounts Matter, Dak & File Management, Pay & Allowances, NPS, Leave Rules leh Vacancy Based Roster-te bakah, Soft skill lam subject – Ethics & Values, Problem-Solving & Decision-Making leh Mental Health chungchangte an zirho dawn a. ATI Director Rita Lalnunmawii Pachuau, Joint Director (Training) Lalrimawii Hmar, Deputy Director (Training) Lalbiakenga, Deputy Director (Finance & Accounts) F. Lalremmawia, Core Faculty Golda Dell Zohmangaihi, Assistant Director Pu B. Tlangdingliana leh Assistant Director Pu Joseph Lalhmangaiaha te'n zirtirna an pe dawn a ni.