IGNOU Convocation vawi 39-na Aizawl-ah hmang

Indira Gandhi National Open University (IGNOU) chuan nimin khan India ram hmun hrang hranga IGNOU Regional Centre thlan bik 39-ah zirlai pass tharte hnena Certificate hlanna hun, IGNOU Convocation vawi 39-na an hmang a; IGNOU Regional Centre, Aizawl atangin mi 1,200-in Degree an nei thar a ni.

IGNOU Convocation hi New Delhi-a Baba Saheb Ambedkar Convention Centre IGNOU Headquarters, Maidan Garhi-ah Vice President CP Radhakrishnan ho a hman a ni a, hemi rual hian India a IGNOU Regional Centre hmun 39-ah a rual a hman niin zirlai 3,13,770 ten Degree an dawng a. IGNOU Regional Centre, Aizawl atangin NIT, Mizoram Director Prof. Dr. S. Sundar hovin zirlai leh Zirtirtuten Video Conferencing hmangin an lo chhim a ni.

IGNOU Regional Centre, Aizawl-a Convocation-ah hian NIT Mizoram Director Prof. Dr. S. Sundar chuan khawvel pum huap a Open University zingah chhawr tlak thiamna pek chhuah kawngah IGNOU chu a tha ber pawl a ni tih a sawi a. Tunlai khawvelah AI in mihring hna tam tak a luahlan rual in, Technology vek chuan kawng hrang hrang ah hna dang a siam belh teuh thung tih a sawi a, heta chhawr theih tur thiamna, Skill Set neih a pawimawh hle tih a sawi a, zirlai pass thar te chuan hemi kawnga hlawhtlinna chang tur in an thiamna te ti pung a theihtawp chhuah turin a fuih a ni. Dr. S.Sundar chuan IGNOU chu University changtlung tak, zirlai tam tak chherchhuaktu a ni tih sawiin, degree mai ni lo, field hrang hrang ah thiamna tak tak pechhuak turin hma a la mek zel tih a sawi a, hetiang zirna In tha atanga zirchhuak thei an ni chu inchhuanna tur a ni thu a sawi bawk.

He hunah hian Khual zahawm leh IGNOU Regional Centre Aizawl-a  Senior Regional Director, Dr. SR Zonunthara chuan kalkhawmte lawmna thu sawi rualin Convocation report a pe a, Convocation-ah hian zirlai pass thar 1200 te chu degree hlan an ni a, chung te chu Master Degree 501, Bachelor’s Degree 624, Post-Graduate Diploma 2, Diploma 12 leh Certificate Programme Learner’s 49 hnenah degree hlan an ni.