Serchhip by-pass road siam mekah 97% zo in Chhiahtlang-a kawng siam mai theih loh siam mek a ni

Serchhip District paltlangtu National Highway-02 in Serchhip khawpui chhung a helna kawng siamthat hna thawh mek chu Ningani khan MJA Serchhip District Member te chuan a hmunah tlawhin an enfiah.
Mizoram Journalists’ Association (MJA) Serchhip District Member te hian kumin February 24 khan Serchhip khawpui chhung heltu NH-02 siamthat hna KRAM Infracon Pvt. Ltd. ten an thawh mek hi an lo tlawh tawh a, hemi tum hian hnathaw zawh loh ala tamin helai hmuna thawktute chuan Serchhip by-Pass Road siamthat hna an thawh mek hi March thla chhunga an zawh hman an beisei thu an sawi a. Hei vang hian MJA Member te hian tun tumah hian an hna thawh chin hi an enfiah leh a ni.

MJA Serchhip District Member te hian Sailiamkawn atanga Kikawn thlengin Serchhip by-pass Road hi an zawh a, hnathawktute chuan tun dinhmunah helai kawng siamthat hna hi zaa 97 zel zo tawh anga an in ngaih thu sawiin, tuna an hmabak chu hmun thum ala nih thu an sawi a. Heng te hi chhimlam-a Sailiam lui-a Lei dawh bula kawng chhuat bal siamthat hna an thawh mek te, nikum lama nasa taka leiminna hmun Serchhip P&E Veng Thlanmual hnuai leh P&E Veng hnuai tho, nasa taka lei tawlhna hmun te a nih thu an sawi a. Ram neitute Court-a an kal avanga Chhiahtlang khawchhunga kawng siam mai theih loh te chu tunhnaiah Court in thutlukna a siam tak avanga siam theih a nih tak avangin henglai hmun ah te hian khawl leh hnathawktu an intirh leh thut avanga heng te pawh hi zo mai thei lo an nih thu te sawiin, Chhiahtlang khawchhunga an kawng siam te pawh hi hun reilote ah zawhfel theih an inbeisei tawh thu leh chumi hnu ah chuan by-pass Road hi an khawih chhunzawm theih tur thu an sawi a. Tunah hian an Bitumen phurtu Motor chu a chhiat avanga a rawn thlen theih loh rualin an hna te hi April 15-ah chuan zawhfel hman ngei an inbeisei thu an sawi bawk.

Serchhip Sailiamkawn-a zangnadawmna avanga ram la fel lo pakhat pawh District Bawrhsap in hma a lak hnuah tihfel thawkhat a nih tawh thu KRAM Infracon Pvt. Ltd. a thawktute chuan sawiin, New Serchhip huamchhung Taxation Office thlang-a lungrem hna thawktu in a leivung a paih loh avanga harsatna an tawh thu te; New Serchhip Khawtetlang Field hnuaia mi thenkhat ten Leivung leh bawlhhlawh an paih thin chu Tuikum lui ti bawlhhlawhtu leh kawng tana him lo zui thei a nih thu leh Chanmari VC ten by-pass pawhtu kawng an laihna leivung an paih fai loh avanga leivung in tuihawk luankawr a hnawh te chu kawng tichhetu ala nih theih thu te an sawi bawk a ni.