MUHCS-ah chhungkaw 12,121 inziaklut tawhin Golden Card nei tan inenkawlna dawn zel theih a ni
Mizoram-a chhungkaw tin ten sawrkar damdawi In-a pawisa pe lawk lova inenkawlna an dawn theihna tur, MUHCS kalpui mekah hian Mizoram sawrkar chuan February ni 16 atanga tun thla April ni 16 thleng khian MUHCS 2.0 hnuaia man chawia online-a inziahluh hun a hawng mek a. Mizoram Health Care Society-a thawktute chuan zawhna chhangin, MUHCS inziaklut zat hi minute tin an pun belh reng a, Ningani chhun dar 12:30 thleng khan online leh offline kaltangin mi 12,121 an inziaklut tawh a. Internet that lohna khua 269-a Health Sub Centre-ah te Ninagni atang khan offline hmanga inziahluhna hawn a ni a, inziaklut zat hi a pun zel beisei a ni bawk.
Tarlan tawh angin MUHCS 2.0-ah hian Rs. 2,500, 5,000 leh 10,000 te a inziahluh theih a ni a. Hei hian chhungkaw khat tan cheng nuai 5 hu thleng man chawi lova inenkawlna a huam a, sawrkar hnathawk nghet zawng zawng chu inziahluh ngai lovin an tel sa a, an hlawh atangin thla tin pawisa an thawh dawn a, Civil Pension leh AB-PMJAY (Golden Card) hmangte tan pawh a hranpaa inziahluh ngai loin, MUHCS-ah an tel sa bawk.
MUHCS 2.0 chungchang ah sawrkar chuan hriattirna tihchhuakin, sawrkar hnathawk nghet lo (Govt. Employees/PE) leh mipui nawlpui man chawia inziaklut (General Beneficiaries) te chuan MUHCS hmang turin MUHCS Card an neih hmasak a tul thu leh Common Service Centre (CSC)-ah emaw, Empanelled Hospital-ah damdawi In luh rualin emaw, muhcs.mizoram.gov.in ah mahni a siam theih a ni bawk. MUHCS Card hi siam hun bituk a awm lo a. CSS/GIA, Pensioner leh AB PM-JAY (Golden Card) hmang thei tan erawh tun dinhmunah MUHCS Card siam a la ngai lo thung tih tarlangin, CSS/GIA leh Pensioner te chuan MUHCS Subscription form hmangin MUHCS hnuaiah enkawlna an dawng thei a, AB PM-JAY chhungkua tan Golden Card hmangin enkawlna a dawn theih bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!