Lawngtlai-ah 'Operarion Jericho' chungchang sawiho

Nimin khan Lawngtlai-ah District Bawrhsap Donny Lalruatsanga hovin Ruihhlo do beihpui thlakna 'Operarion Jericho' chungchang sawiho a ni.

He sawihona hunah hian Bawrhsap chuan Sawrkar in Ruihhlo do beihpui thlakna 'Operarion Jericho' chu a ngai pawimawh hle tih tarlangin, Lawngtlai District chhungah pawh chak taka kalpui mek zel a nih thu leh nikum October atanga kalpui tanin a hlawhtlinna kawng hrang hranga hmuh a nih thu leh Ruihhlo lutchhuak a tlem hle thu a sawi a. He Operation-ah hian Police, Excise & Narcotic, CYLA, YLA Sangau Sub-Hqrs., YLA Bualpui Sub-Hqrs., Executive Magistrate, MHIP, LWA, MJA, Eastern Zone VC, 3rd IR leh 34 AR te an awm thu a tarlang a. 'Operarion Jericho' kalpui mek tihtawp theih a nih loh thu a sawi bawk.

Excise and Narcotics Department lamin an tarlan danin Operation Jericho kalpui mekah thubuai 35 ziahluh tawh niin mihring 33 man an ni tawh a. Zu bikah litre 102.400 man tawhin ND& PS hnuaiah tun thlengin thubuai ziahluh a awm loh thu an tarlang a. Hei bakah hian Police leh CYLA te atangin report hrang hrang ngaihthlak a nih bakah hmalak zel dan turte pawh sawiho nghal a ni bawk.