Serchhip-ah ‘Hriselna Kut - Health Camp’ neih tum a ni
NMBA hnuaia ‘Hriselna Kut - Health Camp’ neih tum chungchang ngaihtuah hian nimin khan Serchhip DC Meeting Hall-ah NMBA District Level Committee chu an Chairman leh District Bawrhsap, Paul L. Khuma hovin an thukhawm a, Bawrhsap chuan ruihhlo do kawnga Serchhip District hmalakna te sawiin, ruihhlo-in hriselna leh khawtlang nun a tihchhiat nasat theih dan te, hriselna ngaih pawimawh nachang te thalai ten an hriat a pawimawh thu a sawi a; inzirtirna uar lehzuala kalpui a nih theih nan leh thalai mai bakah mipui nawlpuiin an pan theih turin, Serchhip District-ah ‘Hriselna Kut – Health Camp’ hi buatsaih tum a nih thu a sawi a ni.
Hriselna Kut-ah hian a duh apiangte’n a thlawna an hriselna dinhmun an entir theihna tur te; damdawi a thlawn emaw, man tlawm zawk emaw a an hmuh theih dan tur te; District Hospital-a thawklaite bakah Serchhipa inentirna la awm ve rih lo, natna thenkhata thiam bikna nei Doctor te chah chhuah an nih tur thu te; hmanhmawh thil thua damlo sawngbawl dan (First-Aid Basic Training) leh thih thut theihna pumpelh theih dan (Emergency response) hrang hrang inzirtirna te; ei leh in leh nun danin a zir loh avanga natna hrang hrang awm thei chungchang inzirtirna te; ruihhlo in hriselna a nghawng theih dan hrang hrangte he Kut-ah hian awm tura ruahman a nih thu te Bawrhsap chuan a sawi bawk a ni.
Ruahman lawk dan chuan Hriselna Kut - Health Camp hi kumin May thla chawhma lama neih hman tum niin Serchhip Deputy Commissioner Office tualzawlah neih tum a ni a, hemi atan hian hmalak dan tur hrang hrangte sawiho nghal a ni a. Serchhip-a Sub-Divisional Police Officer (SDPO) Lalrinzuali chuan ruihhlo dona tura Police Department-in Action Plan an siam a sawizau bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!