Tuikhuah hmanga Irrigation Project lo thlen

Irrigation and Water Resources Department changtu Minister PC. Vanlalruata chuan Minister of State Raj Bhushan Choudhary chu Mizoram-a Tuikhuah te hmanga Irrigation Project kan neih theihna tura hmalakpui turin a ngen.

Mizoram-a rawn zin Union Minister of State for Jal Shakti, Department of Water Resources, River Development and Ganga Rejuvenation Raj Bhushan Choudhary hi nimin zing khan Irrigation and Water Resources Department changtu Minister PC. Vanlalruata chuan Governor chenna, Lok Bhavan-ah kawmin Mizoram tana thil pawimawh tak tak leh mamawh te a lo thlen a. I&WR Minister chuan Mizoram hian ruahtui dawng tha viau mah ila a dahkhawlnate kan neih that loh avang leh tlangram chhengchhe tak kan nih avanga tuia harsatna kan tawh dante sawiin, tui dahkhawlna tha zawk, tuikhuahte hmanga Irrigation Project kan neih theihna tura hma lakpui turin Union Minister hi a ngen a. Hei bakah hian Mizoram in leihnuai tui verhchhuah hmanga (Irrigation) kan hlawkpui zia sawiin, he project hi tihtawp tumna a awmnia a hriat thu a sawi a, chhunzawm leh a nih theihna turin a ngen bawk a. Tlangram kan nih avanga loneitute hnena tui pekna tur Rate (Cost Per Hectare) chu keini ang tlangram tan chuan a beitham avangin a bik taka North East-te tan ennawn sak leh turin a ngen bawk.

Heng bakah hian Mizoram Chief Minister Lalduhoma’n Union Minister hnena lehkha a lo ziah tawh Mat Valley Integrated Project, cheng vbc. 274.25, Irrigation and Water Resources Departmentin DPR a siam, Bramaputra Board a thawn thlak tawh chu enzui saka a rang thei ang ber sanction turin a ngen bawk a. Solar pump leh PMKUSUM hmanga tlangram tui pekna rate hniam bik te pawh tih san turin a thlen bawk a. Mizoram leh tlangram dangte nena hman tngkai tur National Hill Water Security Mission-din a tlangramte tui-a harsatna sutkian dan tur ngaihtuah sak turin Union Minister hi a ngen bawk a. Inkawmna hun tha tak neiin Union Minister pawh hian  Delhi-ah Secretary-te lo sawipui a tum thu in a chhang a, hun remchangah Mizoram lama a enkawltu Department te nen chiangkuang zawk sawihona hun ruahman a tum thu a lo hrilh bawk a ni.