Sethawn-a Jordan Center a hmunah enfiah a ni

Kolasib District chhung Sethawn-a Jordan Center chu Mizoram Synod kut-ah hlan a nih dawn tak avangin nimin khan Social Welfare Department hotute leh Mizoram Synod hotuten a hmunah tlawhin an enfiah.

Sethawn-a Jordan Center hi Mizoram Sawrkar chuan Mizoram Synod enkawl turin kum 15 atan inremna a lo ziah pui tawh a. A hmunhma, building leh a chhung bungrua awm te hi a nih ang ang a inpek turin inremna hi ziah a ni a, nimin khan Social Welfare Department hotute leh Mizoram Synod hotute chuan a hmunah tlawhin he hunah hian Social Welfare Department hi Joint Secretary Zonunthari hovin Official 5 an kal a, Mizoram Synod atangin Moderator Rev John Raldosanga bakah Synod Social Front atangin Rev K. Lallawmzuala, Executive Secretary, Rev P. Zohmangaiha, Secretary, Rev. Lalrinmawia leh member dang mi 3 an kal a ni.

Sethawn-a Jordan Center-ah hian Quarters building 9, chhungkaw 30 vel awm theihna te, Office building, damdawi In bakah hmeichhia leh mipa ruihhlo ngai enkawlna hmun, daidanna tha taka siam a awm a. Ministry of Social Justice & Empowerment norms leh guidelines anga din a nih avangin building hrang hrang Counselling, Detox, Recreation, Dorms, Chapel etc a awm kim hle a. Heng bakah hian bungrua a awm tha hle bawk a, training equipments pawh tamtak a awm sa bawk. Building te hi lian vak lo, a hrang hrang a nih avangin tun dinhmunah mi 70-100 bak an leng lova, a vaiin building hlan tur hi 40 a awm a. Repair ngaite leh thil mamawh belh te enho nghal a ni a. Synod lam hian June thla-a SEC-ah an kalpui dan tur hi an rel fel dawn a ni.

Jordan Center hi Mizoram Synod enkawl turin kum 15 atan hlan a ni phawt anga, kumtin Sawrkarin tanpuina (Grants-in-Aid) nuai 50 a pe ang a, kum 2 danah 5% a tihpun thin tur a ni ang.