Lenkawl

Serchhip District paltlangtu National Highway-02 in Serchhip khawpui chhung a helna kawng siamthat hna thawh mek chu Ningani khan MJA Serchhip District Member te chuan a hmunah tlawhin an enfiah.

Serchhip Bialtu MLA leh Chief Minister Lalduhoma hmalakna in Serchhip khawchhunga zirna In hrang hrang 12 te hnenah White Board (Non-Magnetic 2 in 1 Whiteboard and Chalkboard) sem leh a ni a, heng te hi Bialtu MLA aiawhin Serchhip ZPM Block Thalai hruaitute chuan Ningani khan an School-ah kal chilhin an hlan a ni. Tun tuma dawngtute hi Brilliant Higher Secondary School, New Serchhip; Govt. Serchhip High School, P&E Veng; Govt. JM High School, Serchhip Vengchung; New Serchhip Secondary School, Khawtetlang; Marian High School, P&E Veng; Presbyterian English School, Serchhip; Goodwill English Academy; Govt.Model Primary School, Serchhip Veng-chung; Govt. Chanmari Primary School; Govt. Agri Primary School; All Saints School, New Serchhip leh Chawngbuangi Memorial School, Dinthar Veng te an ni.

Pradhan Mantri Surya Ghar Muft Bijli Yojana (PM-SGMBY) hnuaia Serchhip District-a Model Solar Village atana thlan Buangpui khuaa hmalak dan tur chu Ningani khan District Bawrhsap hovin a Pisa-ah sawiho a ni.

Kristian te ni pawimawh ‘Good Friday’ chu nimin khan khawvel hmundang te rualin Serchhip a Kohhran hrang hrangte pawhin urhsun takin an hmang.

Mizoram Universal Healthcare Scheme (MUHCS 2.0) chu hman tan a ni leh a, MUHCS hnuaiah hian online leh Offline kaltlangin chhungkaw 12,121 an inziaklut tawh a. AB PM-JAY chhungkua tan chuan Golden Card hmangin MUHCS hnuaiah hian enkawlna a dawn theih zel dawn a ni.

Tun dinhmunah Mizoram-ah Vawk pul hri, African Swine Fever (ASF) a len hriat a ni rih lo a, khawi lai hmunah erawh vanduai thilthu a thihpui an awm thung.

Nimin zing khan Sairang atanga Aizawl pan Truck pakhat chu Vaivakawn Veng huamchhung ah chesualin a kang zui a, mihring thi an awm lo. Thudawn danin Truck chetsualna hmun hi Aizawl atanga Sairang panna Vaivakawn Veng huamchhung a ni a, Truck hi Kolasib atanga Aizawl lam pan niin, kawngsira lirthei chesual tur venna, thir phun su chhia in kawngthlang-ah ft. 200 vel ah a lum a; helai hmun hnaia awm te’n an hmuh danin Truck hian Tuailhthei barrel hrang hrang ah a phur a, a Tuialhthei phurh te hi a kang zui ta a ni. Kangmei a chhuah nasat avang hian Fire & Emergency Service te ko-in an thelh a, Truck khalhtu, Lalremruata, Kolasib New Diakkawn a cheng chu motor hian vawrh chhuakin kawngpui ah a vak chhuak a, hliam a neih avangin damdawi In ah enkawl zui a ni.

Lunglei Police te chuan an thudawn bawhzuiin nizan hmasa zanlai khan Lunglei Zotlang-a Jedaz Petrol Pump atanga Dan lova tuialhtheih hralh lai an man a, he thil-a inhnamhnawi nia hriat te chu thubuai siam sak nghal an ni.

Rural Development Department Minister leh Tawi Bialtu MLA, Prof. Lalnilawma chuan Ningani khan a Bial chhung Maite khuaa Community Nursery siam chu a hmunah a tlawh.

Lai Autonomous District Council (LADC) Budget Session chu Ningani khan zawhfel a ni ta a, kum 2026-2027 LADC sum hman tura ruahman cheng nuai 28,028.63 chu lungrual taka Passed a ni.

Sports & Youth Services Department changtu Minister Lalnghinglova Hmar chuan ‘Khelo India Tribal Games 2026’ neih zawh taka a Mizoram tana Weightlifting a Medal la mi pariat (8) te chu Ningani khan a Pisa-ah a lawmpui.

Mizoram Chief Secretary Khilli Ram Meena chuan Ningani khan Kolasib District-a 4 Lane kawng laih mek leh tun dinhmuna kawngpui hman lai mek NH306&06 te chu a hmunah kal chilhin, kawng siamtu NHIDCL leh Contractor te chu a chak thei ang bera an hna la peihfel loh te thawk turin a hriattir.

Mizo Zirlai Pawl (MZP) chuan April 10, 2026 khian Federal Council Sitting an nei dawn a, he hunah hian Mizoram zirna atana thil pawimawh hrang hrang ngaihtuah an tum.

Mizo Students’ Union (MSU) General Hqrs. chuan Mizoram Public Service Commission (MPSC)-in April 1, 2026-a Assistant Professors hnalak result a tihchhuah ah Mizo vek an tling thei chu lawmawm an tih thu sawiin, tling thar zawng zawngte pawh zirlaite leh ram leh hnam hmangaihna rilru nen a hnathawk turin duhsakna an hlan bawk.

Mizo Writers Association (MWA) chuan kum 2025 chhunga Mizo tawnga lehkhabu lehlin tha ber atan H. Ngurthansanga lehlin ‘Second Chance: Israel Narvaez’ tih Darla Milne ziah an thlang a. He lehkhabu hi Mau Mau Gang hotupa Israel Narvaez chanchin a ni a, a nuna Isua a tawn theih nana hun vawi hnih a neih dan tarlan a nih bâkah, Kristiante tana ngaihdamna, piantharna leh rinna thiltihtheihna sawi fiahna lehkhabu tha tak a ni.

Aizawl Municipal Corporation (AMC) General Election, 2026 atana BJP Mizoram Manifesto chu Ningani khan BJP Mizoram President Dr. K. Beichhua chuan a Pisa-ah a tlangzarh a, AMC General Election atan BJP Mizoram chuan Manifesto tha tak leh Aizawl khawpui hmel danglam dawrh theihna tur an nei chu lawmawm a tih thu sawiin, “Manifesto hi keini BJP chuan kan siam satliah ngai lova, kan tih theih tur ngei kan siam thin a ni,” a ti bawk.

Nikum (2025) September atanga kumin (2026) February thla chhunga Khawzawl District a ruihhlo man chi hrang hrangte chu Ningani khan Khawzawl District Drug Disposal Committee te bultumin KVK, Khawzawl-ah tihchhiat a ni a, Bawrhsap K. Vanlathiana chuan a telpui a ni. Tun tuma Drugs halral hi Rs. 119,915,000/- man Methamphetamine kg 20.743 te, Rs. 11,419,000/- man Heroin (No 4) gram 582 leh Rs. 9340/- man Ganja kg. 1.868 te a ni a. Heng ruihhlo kaihhnawih ah hian Khawzawl Police Station-ah thubuai 9 ziahluh niin mi 17 man an ni a. Heng ruihhlo halral hi avaiin Rs. 131,343,340/- hu nia chhut a ni.

Mizoram Rajya Sabha MP K. Vanlalvena chuan Bangladesh nena insumdawn tawnna tura kum sawm kalta a inremna siam tawh tun thlenga hmalakna awm mumal lo leh Kawrpui Lei dawh thuai a tul thu Ningani khan Parliament-ah a sawi a. Rajya Sabha MP chuan Union Home Ministry bul tumin  Khawthlang Tuipui chungah cheng vbc. 54 senna tur Lei (bridge) dawh tan a ni ta chu lawmawm a tih thu sawiin, kum 2021-ah Bangladesh ramri hrula BSF Camp engemawzat a tlawh thu te, BSF Camp thenkhat chu eng kawng mahin a pawh loh thu leh henglai hmuna damlo te pawh inkalpawhna kawng a awm loh avanga an boral phah thu te BSF hotute leh khawtlang hotu ten a hnena an lo thlen thu te a sawi a ni.

 

Serchhip Tuikhuah Veng atanga Serchhip Vengchung leh Field Veng lam panna kawng siam that turah harsatna a awm avangin nimin khan Serchhip NGO Coordination Committee chuan Chief Minister hnenah an lo thlen.

District Hospital, Serchhip-a Dialysis khawl bun thar chu hman theih tura peihfel a nih hnuah nimin khan Bialtu MLA leh Chief Minister, Lalduhawma chuan hawngin Vawiin atang hian a mamawhte tan hman tan tum a ni a, tun dinhmunah he khawl hmang tangkai tur hi mi pasarih an awm mek nia thudawn a ni.

Naktuk April 3, 2026 (Zirtawpni) hi Kristian te ni pawimawh, Good Friday a ni a, sawrkar Pisa chawlh a puan a nih angin zirna In leh sawrkar Pisa te khar a ni ang. Good Friday hi Kristian te chuan Pathianni anga serhin he ni pual hian hun an hmang dawn a, Kohhran tam ber te chuan zanin atang hian Good Friday Programme hi an hmang anga, Kohhran thenkhat ah chuan zanin hian Lalpa Zanriah Sacrament kilho a ni ang.

Kum 2026-2027 Academic Session atan Mizoram-a High School leh Higher Secondary School te chu nimin atang khan an lut tan ve leh ta.

Mizoram Information Service (MIS) Officer thenkhat te awmna hmun chu tunhnai khan siksawi niin Serchhip-a District Information & Public Relations Officer hna chelh mektu Lalnun-mawii chu Directorate of I&PR-ah Deputy Director hna chelh tura sawn a ni a, a aiawh tur hian Junior Grade of MIS atangin Directorate-a awm mek R. Vanneihtluanga chu dah a ni. R. Vanneihtluanga hi Serchhip khua atanga MIS a tling a ni.

Chief Minister leh ZPM Leader Lalduhoma chuan Congress leh MNF te chu an kuhmum rei lutuk nia sawiin, “Keini erawh chu kuhmum hman meuh lovin kan par nghal mawlh mawlh mai a ni,” a ti.

Chakma Autonomous District Council (CADC) hnuaia thawktute chuan Thla 4 chuang hlawh lak tawh loh avangin Vawiin, April 2, 2026 atang hian nawrh huaihawt an tum.

Mizoram Universal Health Care Scheme (MUHCS) 2.0 chu nimin, April 1, 2026 atang khan kalpui tan a ni leh ta a, nakum (2027) March 31 thleng kalpui tur a ni ang.

Mizo Language Development Board (MLDB) buatsaih ‘Thawnthu tawi Inziahsiak’ lawmman semna chu nimin khan Aizawl-a ATI Auditorium-ah neih a ni a, IPR, P&S Department changtu Secretary Betsy Zothanpari Sailo chuan khuallian niin a hmanpui a, khawvel hmasawn zelah mahni tawng bosala hnamdang tawng leh nunphungin thangtharte zingah hlauhawm khawpa Mizote min tibuai tan mek nia a hriat thu tarlangin, chu chu ram leh hnam hmasawnna daltu a nih mai a hlauhawm hle tih a sawi bawk. Thawnthutawi Inziahsiak-ah hian ‘Zirlai mak leh hlu ber chu’ tih ziaktu Vanlaltanpuii, pawl 8, Springdale Academy, New Champhai chu pakhatna niin Rs. 10,000/- a dawng a, ‘The Chocolate’ tih ziaktu Joseph Lalduhawma, PES Melbuk chu pahnihna niin ‘College pass chhuak ve kha’ tih ziaktu Phoebe Lalremruati, Noah’s Foundation, School, Aizawl leh ‘Ka rohlu ber’ tih ziaktu R. Vanlaldampuii, PES Champhai Zote te chu pathumna an ni.

India ram Chhiarpui 2027 chu nimin khan neih tan a ni ta a, nimin zing khan Chief Minister Lalduhoma chuan a chenna In-ah Census of India 2027 Phase-I (Houselisting leh Housing Census) Self-Enumeration tiin he Chhiarpui hi Mizoram-ah chuan tan a ni.

Mizoram Information Service Association (MISA) chuan nimin khan Aizawl-a I&PR Conference Hall, Lianchhiari Run-ah General Conference an hmang.

Mizoram sawrkar chhinchhiah danin, kum 2024-2025 inkara SASCI sum hmuh atangin Mizoram chhungah Zirtirtu Quarters 62 sak a ni.

Mizoram University Department of Botany chuan Sekhupthur species thar ‘Begonia mizoramensis’ tih chu an hmuchhuak thar a, a species hming hi Mizoram hming chawi a phuah a ni a, Thiak-ah leh Khawrihnim-ah hmuhchhuah a ni. He thlai hmuhchhuah thar hi ral mai thei dinhmun a ding niin, Conservation status Critically Endangered (CR)-ah dah a ni a, Research Paper hi Taiwania Journal-ah online a en theih a tihchhuah a ni bawk.

All Mizoram Vawk Vulh Association (AM-VVA) chuan Mizoram chhunga African Swine Fever (ASF) a lo leng leh tan tih sawiin, State pawn atanga Vawk lakluh atangin ASF hi a darh ni ngeia rin a nih thu an sawi a. African Swine Fever (ASF) hri hi a darh zel lohna turin State pawn atangin Vawk lakluh phal a nih loh thu sawiin, he thuchhuah bawhzui hian thu zawm lo apiang te chungah a tul anga hmalak a nih dawn thu an sawi bawk.

Social Welfare Department leh Mission Foundation Movement (MFM) tangdunin kum upa te enkawlna lam, Gariatric Caregiver zirchhuak mi 120 te hnenah nimin khan Certificate an hlan a, heng Training chhuak te hnena Certificate hlanna hi Champhai, Lunglei, Mamit leh Saitual-ah te neih a ni a, hetiang Training hi College zirlai zinga zir ve duh ten remchanna an neih theihna turin District hrang hrangah hian hun hnih (2)-a kalpui a ni.

All Mizoram Vawk Vulh Association (AM-VVA) chuan Mizoram chhunga African Swine Fever (ASF) a lo leng leh tan tih sawiin, State pawn atanga Vawk lakluh atangin ASF hi a darh ni ngeia rin a nih thu an sawi a. African Swine Fever (ASF) hri hi a darh zel lohna turin State pawn atangin Vawk lakluh phal a nih loh thu sawiin, he thuchhuah bawhzui hian thu zawm lo apiang te chungah a tul anga hmalak a nih dawn thu an sawi bawk.

Niminpiah tlai khan Goa Mizo Welfare te buatsaihin ‘Chapchar Kut 2026’ chu Sneh Banquete Hall, Porvorim, Goa-ah hman niin Central YMA President R. Lalngheta leh Fin. Secretary MS. Ralte te chuan an hmanpui a, Central YMA President chuan Mizo thalaite chu Zu leh ruihhlo avanga buai mai mai hman an ni tawh lo tih sawiin, zu tamna hmunah pawha zu in ngai lo thalai tam tak an awm avangin Mizote an tihmingtha a, midang tan hnathawh ve na tur kawng in hawng zel tih a sawi bawk. Goa Mizo Welfare-ah hian Member 1200 chuang an awm a, Chapchar Kut hmangtu te hian Kut ruai an theh nghal bawk a ni.

Chief Minister Lalduhoma chuan kum 2025-2026 Financial Year-a ni hnuhnung ber, niminpiah March 31, 2026 tlai khan Aizawl-a Treasury Office tlawhin thawktute nen an inkawm a, an hnathawh dan te a sawipui bawk. He hunah hian Chief Minister chuan kumin ah Finance Department-a thawktute thawhrimna zarah SASCI hnuaiah Efficiency in Public Financial Management lawmman an hmuh thu sawiin, Sawrkar laipui hnuaia sum kalpuina SNA SPARSH leh GST TDS avangin engemaw harsatna neuh neuh tawk mah se State sum enkawlna kawngah hma an sawn nasat thu a sawi bawk. He hunah hian Minister Dr. Vanlalthlana leh Adviser to CM TBC Lalvenchhunga bakah sawrkar mi pawimawh ten Chief Minister hi an tawiawm a ni.

 

Mizoram Journalists’ Association (MJA) Serchhip District Member te chuan nimin khan Thenzawl-a Deer Park tlawhin helai hmuna Sazuk khawi an kalpui dan te an thlirho.

District Hospital Serchhip-a Dialysis khawl bun thar chu hman theih a nih hnuah Vawiin hian hawn a ni dawn a, naktuk atangin hman nghal tura ruahman a ni.

Food, Civil Supplies and Consumer Affairs Department chuan tunlai khawvel geo politics boruak avanga eirawngbawlna gas leh tuialhthei chungchang ah mipuiten harsatna an tawh loh nan puitu turin State Level-ah leh District Headquarters tinah Command/Helpline Centre a din a, mipuiten mahni District theuha Helpline Centre te hi hmang tangkai turin an ngen a. Serchhip District tan Helpline Contact Number chu 03838-222432 niin State Helpline Centre chu 1967 (Toll Free) leh 9436159263 (Joint Director, FCS&CA) a ni ang.

India rampum-a Chhiarpui neih tur chu ramchhung hmun dangte rualin Vawiin, April 1, 2026 atang hian Mizoram-ah pawh tan a ni dawn.

MNF Legal Board hruaitute chuan Inthlan dawn apianga Hmeichhe Candidate-ten mawi lo tak taka Social Media-a beih an tawk thin chu pawi an tih thu sawiin, India rama literacy rate sanna State tih atan chuan a mawi lo ni mai lovin tih loh tawp tur a nih thu an sawi bawk. 

Mizoram State Rural Livelihood Mission (MzSRLM) hnuaia din Ropuiliani Women Farmer Producer Company Limited (FPC) chuan Mamit leh Kolasib District-a an Shareholders te tharchhuah Aieng an lei Metric Ton 71 (kg 71,600) chu nimin khan Kolasib DC Office Complex atangin vailiam a ni.

Mizo Juda awm thenkhat tiamin India rama Juda Hnam awmte chuan Vawiin atanga serh tan tur, Kalhlen Kut an hmang ve dawn lo.

Chief Minister Lalduhoma chuan Finance Commission 15-na ruahman angin VC-te pualin Mizoram in cheng vbc. 362 a dawn kim thu a sawi.

Mizoram-a NCC Fest & Parasailing Camp hmasa ber tur chu thla thar May 5 - 11, 2026 chhung khian Lunglei-ah buatsaih tum a ni.

Manipur-a Lamka Branch YMA te chuan Mizo Comics lar tak, ‘Sudden Muanga’ tih ziaktu, Lalsangzuala’n he Comics a ziakna hmanrua leh a bungraw hlui dangte chu Mizoram State Museum-a dah turin Central YMA kutah an hlan.

Mizoram chu India rama HIV Positive sanna ni mahse HIV damdawi, ART eite an hrisel that a, an damrei chu thil lawmawm a nih thu MSACS hotuten an sawi.

Mizoram Rural Bank (MRB) chuan Corporate Social Responsibility (CSR) kaltlangin nimin khan Computer 32, Printer 4 leh Smart Interactive Board pakhat chu hmun li-ah an hlan a, nimin-a CSR kaltlanga an thilpek hi Rs. 19,94,220/- hu zet a ni. Thilpek inhlanna hun MRB Head Office Board Room-a neih ah CSR Committee Secretary V. Lalrinmawia chuan Mizoram Rural Bank chuan Bank profit atanga chhuta CSR kaltlanga pawl, khawtlang leh Sawrkar Office hrang hrang tana an luanchhuah thin tawh thu a sawi a, tun tumah hian ITI (LESDE), MJA, Champhai SP Office leh HATIM-ah te heng thilpek hi an hlan a ni.

Mizoram Press Owners’ Association chuan nimin khan thuchhuah siamin hun engemaw chen atanga Mizoram Sawrkar leh Mizoram Press Owners’ Association tangdunin Mizoram Text Book chhutna tur Printing Press, Phunchawng Mel-10 hmuna a din chu kumin (2026) hian hlawhtling tanin, a vawi khatna atan Mizoram chhungah hlawh-tling takin Zirlaibu Colour a chhut a ni tih sawiin, lawmawm an tih thu an sawi a. Kum lo kal zel turah pawh Mizoram Text Book chhut nana vai rama sum tam tak liam thla zel lova, Mizoram chhunga sum a luh a, mi engemaw zatin he Press hi eizawnna atana an hman theih zelna tur a hma lakpui zel turin sawrkar an beisei tih an sawi bawk.

Kolasib District Magistrate Lalmuan Puia chuan tunhnai maia thenawm Assam State-in Inthlanpui (General Election) an hmachhawn dawn avangin Election Commission of India (ECI) inkaihhruaina hnuaiah State inrina (Inter-State border) huamchhungah te venhimna uluk zawk leh khauh zawka kalpui mek a ni tih sawiin, Duty leh Patrolling te pawh neih uar a nih thu a sawi a. Hemi a nih avang hian ramri hrula khawsa leh veivak thinte pawh fimkhur thiam tur leh thil pawi thleng thei laka inveng theuh turin mipuite a ngen bawk.

Legal Metrology Enforcement leh Centre For Consumer Education tangkawp chuan nimin khan Rangvamual-ah Liquified Petroleum Gas (LPG) cylinder phurtu lirthei endikin LPG bur 30 vel chu tih chingpen a nih thu leh a buk a tling lo tih an hmuchhuak a, Centre For Consumer Education chuan hetianga Gas tihchingpen a ni thin chu consumer-te chanâi chhuksakna a nih avangin pawi an tih thu leh a tichingpentute hrem tura hma la tura sawrkar an phut thu an sawi bawk.

 Hulhliap Short Stay Centre (SSC) atanga chhuak te tana Skill Training – Plumbing General leh Assistant Electrician neih a training chhuak mi 22 te hnenah nimin khan Certificate hlan niin heti hian tun thleng hian Hulhliap SSC chhuak mi 118 hnenah Certificate pekchhuah a ni tawh. MFM Skill Training Centre, Dawrpui Vengthar-a Training chhuak te hnena Certificate hlanna hun hi Task Group on Aftercare, Skill Training & Handholding-a Member Secretary Vanlalhruaii chuan kaihruaiin MFM Director, Upa Dr. R. Vanlalzauva chuan tun tumah hian Certificate sem chhuah tur 22 an awm thu sawiin, mi 13 ten Assistant Electrician zirchhuak in mi 9 ten Plumbing General training an zawh thu a sawi a. Heng Training hi March 16 khan tanin Trainer atan Lalremruata(Electrician) leh Gideon Vanlalruata (Plumbing trainer) te hman an nih thu a sawi bawk.