AMC leh LCM tana sum ruahman sawrkar in a ti lapse niin sawi

Aizawl Municipal Corporation (AMC)-a Mayor hlui Lalrinenga Sailo chuan AMC leh Lunglei Municipal Council (LMC) te hna thawhna tura ruahman tawh cheng nuai 3400 chu Mizoram sawrkarin a ti lapse tih a sawi.

Aizawl Mayor hlui Lalrinenga Sailo hian nimin khan Aizawl Press Club-ah Chanchinbu mite kawmin, AMC leh Lunglei Municipal Council (LMC) te hna thawh a tur sum ruahman tawh cheng nuai 3,400 chuang ZPM sawrkarin a ti lapse chu Municipality ngaihthahna a ni tih a sawi a. ZPM sawrkarna ngei LMC-in a hmasawnna hna a thawhna tur Finance Commission 15-na in a ruahman sak, kum 2024-25 leh 25-26 chhunga hmuh tur belhkhawm Rs. 18,69,92,000/- chu hmang thei lo in sawrkar laipui-ah a lét leh vek tih a sawi a, hei bakah hian AMC-in a sum hmuh tur ZPM in Grant Transfer Certificate chu Ministry of Funance leh Ministry of Urban Affairs-ah a huna a thawn loh avangin cheng nuai 15,26,60,000 chu sawrkar laipuiah a let tih a sawi bawk a. LMC leh AMC ten khawpuia cheng mipuite tana hmasawnna hna an thawhna tur sum ZPM sawrkarin a tih lapse belhkhawm hi Rs. 33,96,52,000/- lai a tling niin a sawi bawk.

AMC Mayor hlui chuan LMC ngei pawh ZPM sawrkarin hna thawk thei lovin an siam niin a sawi a, sawrkar laipui thupek anga Property Tax an lak tur pawh la mumal thei lovin an siam nia sawiin, kum 2024-25 chhunga cheng nuai 79 vel an lakkhawm ve pawh a hunah an khawn loh avangin a hunah Central sawrkarah an report hman lo a, Finance Commission sum ruahman sak pawh a zawnin kum 2 chhung an chân phah niin a sawi bawk.