Serchhip khawpui cheimawina kawnga hmalakna hrang hrang Bawrhsap hovin thlirho a ni

Serchhip khawpui cheina tura hmalakna, Serchhip Beautification Project hnuaia hmalakna hrang hrangte chu nimin khan Bawrhsap Paul L. Khuma hovin thlirho a ni.
He thlirhona hun Serchhip DC Meeting Hall-a neih ah hian Serchhip khawpui chhung pengthuam pawimawh hmun sarih-ah Signage lian tak tak phun a nih tawh thu leh hei aia te hret hi pengthuam dang panga (5)-ah phun belh leh tura ruahman a nih thu tarlan a ni a. Zebra Crossing pawh hmun 45-ah siam niin kawngpui dung leh hmun pawimawhah Serchhip cheimawina tur Palm thing 300 dawn phun a ni tawh a, ke-a kalna Foothpath hungna-ah te pangpar pot engemawzat tar niin Serchhip Indoor Stadium bul kawng sirah Mizo Culture pholang thei tur tarmawi (mural) lian tak dah a ni tawh a, Helipad bulah Park mawi tak siam mek niin, Street Lamp post pawh phunin kawtthler cheimawina atan Lamp te khai a ni dawn bawk a ni.

Bialtu MLA leh Chief Minister Lalduhoma Fund atangin Water Vending Machine changkang tak dahna tur sum cheng nuai 5 hmuh niin he khawl hian Serchhip a lo thleng tawh a. Serchhip khawpui hulum laia dah tur Pastor Chhawna lim (bust) siam zawh ni tawhin New Serchhip leh Bazar-ah te fountain dah tum a ni bawk a. Chhiahtlang leh Serchhip inkarah ‘I Love Serchhip’ tih inziak dah tum niin Chhiahtlang laili lai taka High Mast-ah thutmuanna hmun siam tum a ni bawk.

Thutkhawm ah hian Bawrhsap chuan Serchhip Town Area-a Village Council te, Florists Association te, NHIDCL Contractor te leh Department hrang hrangten Serchhip khawpui cheimawina atana an sum leh pai, an tha leh zung nasa taka an seng chu lawmawm a tih thu a sawi a. District Level Beautification Competition lawmman cheng nuai 50 chauhin a daih sen loh thu te, ruahmanna kal mek hi cheng nuai 80 dawn a tlin tawh thu te, mihring tha nena chhut phei chuan senso a san tawhzia leh a la san belh turzia sawiin, Serchhip Beautification Project hlawhtlinna chu mipuite leh sawrkar thawhhona vang a ni, a ti a. Serchhip khawpui cheimawi hna thawh mek hi a puitlin hunah a enkawltu tur mipuite an pawimawh tih sawiin, “Kan enkawl that loh chuan kum reilote ah hnawk leh tawp-ah a chang thei a ni,” a ti bawk.