Early Childhood Care & Education zirhona leh thawktute tana Smart Phone semna neih a ni

Mizoram sawrkar-a Women & Child Development buatsaihin nimin khan Early Childhood Care & Education chungchanga inzirtirna leh Field Level-a hnathawhna tur Smart Phones semna hun buatsaih a ni.

Dawrpui Multipurpose Hall-a he hun hman hi Women & Child Development changtu Miinister Lalrinpuii chuan hmanpuiin Women & Child Development hnathawhna atana Smart Phones pawimawhzia te, hna langtlang leh awlsam zawka thawhna hmanrua a nih thu te sawiin, Smart Phone nei tura kawng tam tak paltlanga hma latu Women & Child Development a thawktute hmalakna lawmawm a tih thu a sawi a. He Smartphone hi sem satliah a ni mai lovin, hnathawhna tur hmanraw tha zawk sem a ni tih hre rengin, theihtawp chhuaha kan ram tana thawk zel turin kalkhawmte a sawm a ni. He Smartphones hi Mizoram hmun hrang hranga Anganwadi Worker-te leh Field Functionary-te hman tura semchhuah vek tur a nih thu pawh Minister chuan sawiin, “He Smartphone hian kan ram tana hna kan thawhna kawngah hmasawnna a ken ngei theihna turin a hmangtu zawng zawng leh Women & Child Development-a thawktu zawng zawng te duhsakna ka hlan a che u,” a ti.

Minister hian Smart Phones tlangzarhna leh semna hun hmang nghalin Anganwadi Worker 10, Aizawl Urban ICDS Project leh Tlangnuam ICDS Project te hnenah Smart Phones hi a hlan a, he hun kaihruaitu Social Welfare, Women & Child Development Department changtu Secretary Lalzarmawii chuan an Smart Phone semchhuah chu department hnathawhna atana pawimawh tak a nih thu leh khawvel hmasawnna mila hnathawh dan an siamrem ve thei zel a tul zia te a sawi a, heng hmanruate hi hnathawhna atana hmang tangkaia, taihmak chhuah lehzual turin a hmangtu tur, Field Functionaries (Anganwadi Worker, Circle Officer leh Poshan 2.0) te a chah bawk.

Nimin-a Training-ah hian Women & Child Development Director Zoramthangi Chhangte chuan Anganwadi Worker-te nihna leh mawhphurhna sawifiahin, tlawmngai, khua leh tui hmangaiha a hmasawnna tur a theihtawp chhuah mi an ni tur a ni tih a sawi a. Anganwadi Worker tha nihna hrang hrang - Hun vawn dik, Faina kenkawh, tawngkam mawi leh hawihhawm, SNP sem leh siam pawimawh hrang hrangte a zirtir bawk a ni.