Hmeichhe naupangte chanvo leh humhimna zawm that a pawimawh thu High Court Judge in a sawi

Gauhati High Court Judge, Justice Michael Zothankhuma chuan Dan chi hrang hrang hmanga hmeichhe naupangte chanvo leh humhimna zawm that a pawimawh thu a sawi.

Hmeichhe naupang te venhimna tura Guwahati High Court Juvenile Justice Committee in Inrinni-a inrawn-khawmna hun, ‘State Level Multi-Stakeholders Consultation on Safeguarding The Girl Child : Towards a Safer and Enabling Environment for Her in India’ a buatsaih a hmanpuina ah he thu hi sawiin Justice Michael Zothankhuma chuan Mizoram-ah a vawikhat nana hmeichhe naupang humhimna tura hmalakna buatsaih a ni chu hmasawnna pawimawh tak a nih thu a sawi a, hei hian awmze nei zawka hmeichhe naupangte humhim kawngah hmasawnna a thlen ngei a beisei thu a sawi a ni.

He hunah hian Social Welfare, Women & Child Development Minister Lalrinpuii pawhin hmeichhe naupangte chu an Inchhungkhur mai bakah Sikul-ah leh khawtlangah thlamuang taka an awm theih nan venpui reng a tul thu a sawi a. Mizoram chu ziak leh chhiar thiam tamna lamah India ramah a sang a, mipuite an vengva bawk tih sawiin, heng te vang pawh hian hmeichhe naupangte humhim kawngah India ram hmun dang aiin Mizoram in a titha niin a hriat tih a sawi a. Mizo khawtlangah hmeichhiate an zalenin an vannei em em tih sawiin, hetihrual hian hmasawn zel an la ngaih thu a sawi a. Hmeichhe naupangte an inchhungkhur mai bakah School-ah leh khawtlanga an himna chu sawrkar hmalakna bik tur ni lovin Kohhran, khawtlang leh tlawmngai pawl hrang hrangte bakah zirtirtute nen thawhhona tha tak neih chhunzawm zel a pawimawh tih a sawi a ni.

He hunah hian hmeichhia te venhimna tur zirho zui a ni a. Thupui hrang hrang zirhona leh sawihona hun chu a kaihhnawih Mizorama sawrkar department hrang hrang aiawhte kaihhruaiin hman chhunzawm a ni.