Mission Vatsalya hnuaia tanpuina dawng tur thlang

Mission Vatsalya hnuaiah Serchhip District-a naupang 40 te chu District Sponsorship and Foster Care Approval Committee chuan chhawmdawlna pek turin an pawm.
Integrated Child Protection Service (ICPS) tia hriat thin, Mission Vatsalya Ser-chhip District-a Sponsorship and Foster Care Approval Committee chu nimin khan an Chairman leh bawrhsap Paul L. Khuma hovin a Pisa-ah an thukhawm a, he hunah hian Serchhip District chhunga naupang chhawmdawl ngai rawtna lutte chu en ho niin an dinhmun ngaihtuah chungin naupang 40 te chu chhawmdawlna pek tura pawm a ni a. He ruahmanna hnuaia chhawmdawlna pek theih dan hrang hrang tehfung-ah hmangin chhawmdawlna pek turte hi uluk taka thlan an ni.

Mission Vatsalya hi sawrkar laipui hmalakna niin naupang venhim ngai leh enkawl ngaite tan hamthatna tur peng hrang hrang kalpui a ni a. Chung zingah chuan Sponsorship leh Foster Care hi telin sum leh pai-a naupang chhawmdawl mamawh ngawih ngawih - nu leh pa nei lo, natna khirh vei te leh harsatna khirh tak dang tawktute hnenah chhawmdawlna hi pek thin a ni a. He rua-hmanna hnuaiah hian dilna thahnem tak lut thinin heng te hi District Sponsorship and Foster Care Approval Committee chuan uluk taka enfiahin, chhawmdawlna dawng awm mi an ni em tih an zirchian hnuah dawng awma an ngaih te pek thin an ni a. He Committee hian sponsorship dawngtute chu tanpuina an dawn an hman dan an vilo zui thin a ni.

Sponsorship Programme hi kum 2023 atang khan kalpui niin he ruahmanna hnuaia tanpuina dawng tura thlan te hi thla tin Rs. 4000/- a tanpui thin an ni a. A hmasa berah kum 2023 khan Ser-chhip District-ah tanpuina dawng tura thlan mi 54 awmin kum kalta 2024-ah khan mi 125 pawm an ni leh a. Kumin ah mi 40 pawmin nimin-a thutkhawm ah hian District Child Protection Officer R. Lalramdinmawii bakah CWC-a Chairperson leh MHIP Sub-Hqrs. President te pawh an tel a ni.