Home Minister in thawhrimna a pawimawh thu a sawi

Home Minister K. Sapdanga chuan thil eng pawh kan tihna ah hlawhtling tur chuan thawh-rimna a pawimawh hmasa ber tih a sawi.

Nimin a Aizawl City College Joint Student Union Assembly leh Hruaitu thar thlanna Aizawl-a I&PR Auditorium-a neih a hmanpuina ah Home Minister K. Sapdanga chuan ram leh hnam thanna leh hmasawnna kawngah Zirlaite chu mawhphurtu lian berte zing a mi an ni tih inhre reng tura fuihin, thil eng pawh an tihnaah hlawhtling turin thawh-rimna chu a pawimawh hmasa ber tih a sawi a, Mizoram in All India Service leh Central Service a lut Mizo thalai a nei lo rei ang a langte, thalaite zinga ruihhlo ngawlveina hluar em em lawi si te chu Zirlaite zingah uar taka inhrilhhriat a tul tih tarlangin, Zirlaite chu theihtawp chhuah a, anmahni leh ram leh hnam tana mawhphurhna pawimawh tak an neih chu hlenchhuah tum tlat turin a chah bawk a ni.

He hunah hian khual zahawm National Institute of Technology (NIT) Director Prof. S. Sundar pawhin NIT chu India ram pumah 31 chauh a awm thu leh chung zinga pakhat chu NIT Mizoram a ni tih a sawi a. Mizo Zirlaite chuan an tana Seat dah pawh eng eng emaw avanga an luah zawh loh thin thu sawiin, Zirlai kalkhawmte chuan chonaa ngaia NIT-a lut thei ngei tura an Zirlai a theihtawp chhuah turin a fuih a. NIT atanga zirchhuakte chu Company hrang hrangte pawhin an duhsak thu leh NIT Zirlaite chu a nawlpui hnaa an luh vek zel thu a sawi a. Mizo Zirlai tam tak zingah pawh hruaitu ni theite chu theih-tawp chhuaha an beih phawt chuan NIT thleng pawha titha zingah an tan theih ngei a beisei thu a sawi bawk a ni.

ACCJSU Assembly leh Inthlanna hi an Vice President FH. Lalhmunenga chuan kaihruaiin Report hrang hrang ngaihthlak a ni bawk.