GSDP tih takzet-a kalpui a tul tih Minister in a sawi

Sports Minister Lalnghinglova Hmar chuan kum 2036-a India in Olympics thlen a tumah Mizo infiammi an tel ve theih nan Grassroots Sport Development Programme chu tih takzeta kalpui a tul tih a sawi.

Nimin khan Aizawl-a Ramhlun Indoor Stadium Conference Hall-ah Grassroots Sport Development Programme hmanpuiin Sports Minister Lalnghinglova Hmar chuan naupang infiammite kaihruaia, Zirtirtu tur Coach kalkhawm te chu inthunun a, hun vawng dik turin a chah a, an naupang kaihhruaite tana entawntlaka awm tur leh mahni khaw naupangte chawikang a, hmasawnna tha zawk an neih theih nan GSDP chu kalpui turin a fuih a. Infiammna chu tih takzeta kalpui a tul tih sawiin, training thulh mai mai lo turin a chah a, GSDP chuan naupangte ah danglamna a thlen ngei tur a ni tih sawiin, sum sen thlawn a nih tawh loh nan tih dan ngai reng a kal chuan rahchhuah ngai reng an neih thin avangin GSDP chu a danglamin an kalpui dawn tih a sawi a n.

Sports Minister chuan India in kum 2036-a Olympics thlen a tumah Mizoram pawh tel tir ve ngei an duh tih sawiin, ram pum huap leh khawvel huap inelnaah te tel ve thei tur chuan a bulthut atanga inbuatsaih tan a ngai tih a sawi a, chuvang chuan Grassroots Sport Development Programme chuan rah tha zawk a neih theih nan leh sang zawka kalpui a nih theih nan School Education Departent atangin Mizoram States Sports Council hnenah hlanchhawn a ni tih a sawi bawk.

Grassroots Sport Development Programme (GSDP) hi Samagra Mizoram hmalakna hnuaiah Mizoram States Sports Council (MSSC) nen thawkho a kalpui a ni a, he hmalakna hnuaiah hian Mizoram-a District hrang hrangah Centre 46 hawn niin, Sports dicipline pakua (9)kalpui a ni dawn a, he programme in a tum ber chu Mizoram atanga infiammi a tam thei ang ber chu khawvel huap inelnaah te India aiawha chhuak thei tura chherchhuah a ni. 

He hunah hian National Hockey player leh National Umpire ni lai, K. Ngaihpari chuan GSDP kal dan chu naupang tan a tha hle tih sawiin, Hockey bikah phei chuan bul tanna atan duhthusam nia a hriat thu a sawi a, zirna changtlung zawkah te zir chhovin National leh International Level Tournament thlengin an khelh theih phah thin a, GSDP chuan naupang talent nei tha tak tak, an theihna pho chhuahna tur hun nei remchang lote zawnchhuah chu a tum ber a nih thu a sawi a ni.

GSDP hi Mizoram hmun hrang hrangah kum 2025-2026 chhungin kalpui tum a ni a, kumin September thla atanga chhiar tanin thla ruk chhung kalpui a ni dawn a. Zirlai naupang kum 6 – 14 inkarte inkarte infiamna nihphung leh bulthut inzirtirna hmun tur a ni.