Indian Road Congress Mid-Term Council Meeting vawi 233-na Mizoram-ah neih tan a ni

India ram-a kawng kaihhnawiha hnathawktu Engineer leh pawl hrang hrang aiawh mi thiam inzawmkhawmna pawl, Indian Road Congress (IRC) Mid-Term Council Meeting vawi 233-na chu nimin khan MZU Auditorium-ah neih \an a ni a, Chief Minister Lalduhoma leh Union Minister of State for MoRTH Harsh Malhotra te chuan an hmanpui a ni.

233rd Indian Road Congress Mid Term Council hawnna inkhawm ah hian khuallian, Chief Minister Lalduhoma chuan Mizoram chuan Airport pakhat leh Rel kawng pakhat chauh a la neih avangin kawngpui chu kan nitin chak lakna hnar leh kan innghahna a ni tih sawiin, chutihlaiin kan Road Density chu kilometre za bial-ah kilometer 46.37 (46.37 kms per 100sqkm) chauh a la nih thu leh India ram kawngpui density chawhrual (national avarage) chu 116kms per 100sqkms a ni thung tih a sawi a. “Kan dinhmun a la hniam hle a. Kawngpui kan mamawh belhna a la sanzia chu khawtin atang hian an Lo leh huan panna kawngpui laihsak dilna hi a lo lut chur chur reng mai a. Thingtlang khaw mawngping kan tih ang chi, an khaw thenawmte nena inkalpawhna la mamawh pawh kan ngah hle,” a ti.

Mizoram-a National Highway sial hnathawktuten leivung paihna (spoil banks) an hman that tawk loh thu leh environment leh loneituten an tawrh nasat thu pawh Chief Minister chuan sawiin, tunhnuah chuan tha taka kalpui zel tawh turin a chah a. Kawngpui siam thar ni si, chhe hma leh lutuk, Fur khat pawh daih lova siam a ni thin chu tihbo a duh thu te, kawng kual a la tam lutuk chu a ngaimawh thu leh hmun tam tak chu sum sen belh lutuk lova ngil taka sial theih nia a ngaih thu te, kawngpuiin kawrte a kanin kawrte-a Hume Pipe dah thlak a, a chung chu leia hnawh khah a, kawngkam ah hnuhma thar tha tak tak siam belh zel mai thaa a hriat thu te, hnathawktuten khaw kar kawng aiin khaw chhung kawng khawih hmasa zel se, mipuiten hmasawnna lo chhawr hma zel se a tha a tih thu te a tarlang a. Tun sawrkar kum kal mekah Central Road Fund chu cheng vbc. 300 tal Centralin Mizoram pe thei se a duh thu a sawi bawk a. Mizoram chu Fur ruahtui dawng tam ram a nih avangin National Highway te chu Rigid Pavement in siam thei zawk ila a siamna man a lo sang deuh a nih pawhin a enkawl zuina man a tlem ve thung thu leh a tlo thu a sawi a. “International ramri thui tak nei kan nih avangin kan National Highway te hi Strategic Road-ah puang ila, chak zawkin hna kan thawk thei ang a, kan ram tan a tangkai zawkin ka ring,” tiin Mizoram-a National Highway enkawl dan tha zawk nia a ngaih a tarlang bawk a ni.

He hunah hian khual zahawm Union Minister of State for MoRTH Harsh Malhotra pawhin kawngpui tha neih chu kan ram ei leh bar hmasawnna nen a inzawm tlat tih sawiin, “Central sawrkar hian a ngaipawimawh a, hma a la nasain hmachhawp pawh a ngah hle. Thingtlang lamah pawh hmalakna hi kan zauh zel dawn a ni,” a ti a. “Khawvel ram dangte el phak a kan quality kan tihsan a, kan leilung, sik leh sa leh ram awmdan azir zela hmanrua leh design tha kan ngaihtuah chhuah zel a ngai a ni,” tiin “Mizoram-a National Highway te Rigid Pavement ni tawh se tia Chief Minister-in a ngenna hi kan hria a, tihhlawhtlin ngei kan tum dawn a ni,” a ti bawk.

He hunah hian Mizoram PWD Minister Vanlalhlana bakah Indian Road Congress-a President Prof. Manoranjan Parida leh Secretary General Rahul Gupta te pawhin thu sawiin, PWD changtu Secretary K. Lalthawmmawia chuan inlawmna thu a sawi bawk a ni.

Indian Road Congress hi kum 1934-a din niin India rama Engineer zawng zawng, sawrkar, Company leh mimal hnuaia thawk leh thawk lo te pawh an tel vek theihna, Highway Engineering a pawl lian ber (Apex Body) a ni a. India rama road, bridge leh tunnel engineering kalpui dan tur standard tinreng duangtu a ni.