'Zoram Entu Meichher Seminar' buatsaih a ni

School Education Department-a Adult Education Wing-ten thlakip chhuak Magazine an tihchhuah thin 'Meichher' Golden Jubilee pualin nimin khan ‘Zoram Entu Meichher Seminar’ chu School Education Directorate Conference Hall-ah neih a ni a, he hun hi School Education Director Angela Zothanpuii chuan hmanpuiin Meichher Golden Jubilee lawm kum takah Mizoram chu ziak leh chhiar thiam, Full Literacy-a puan a ni ta chu Meichher thiltum hlawhtlinna ropui tak a ni tih a sawi a. A tirte atanga buaipuitu R. Lalrawna chu Literature & Education huangah Padma Shree Award hlan a lo ni leh pawh Meichher Chanchinbu hlutna tarlangtu a ni tih a sawi bawk.

He hunah hian 'Meichher' Editor TC. Lalremsiama chuan report pe in, Adult Education Wing-in an tihchhuah thlakip chhuak chanchinbu 'Meichher' chu a tirah chuan 'Zoram Eng' tiin tih-chhuah niin, kum 1975 March leh April thla chhuak chu a bultanna a ni a, amaherawhchu a tulna leh remchan zâwkna avangin kum 1975 October thla chhuak atangin 'Meichher' tia a hming thlâk a nih thu a sawi a. Kum 1975 March leh April thla chhuak atanga chhiarin June 2025 chu bu 808-na a ni tih a sawi bawk.

'Meichher' hi sawrkar sum sêngin a tîr atangin thla tin bu 3000 zêla tihchhuah a ni a, a thlawna sem a ni a. Hripui COVID-19 lêng avâng khân 'Meichher' pawh thla engemaw zât chhung chu bu 2800-a tihchhuah a ni a; mahse, kum 2022 November thla atanga tûn thlengin bu 3000-a tihchhuah zui a ni leh ta a. Publisher atân tihchhuah tan tirh atangin Department hotu ber Director chu tûn thleng hian hman a ni thin a ni.

Nimin-a Seminar-ah hian mithiam hrang hrang pali ten thupui buatsaih chu zirho a ni a, Meichher Golden Jubilee lawmna pui ber chu naktuk-ah neih a ni thung ang.