Foreigners Identification Portal (FIP) system hmangin Myanmar raltlante chhinchhiah dawn

Myanmar tualchhung buai vanga Mizorama raltlan awmte chhinchhiah hna, ‘Biometric Enrolment’ chu thla thar, July, 2025 atangin thawh tan tum a ni a. Raltlante hi Mizoram sawrkar duh dan angin Foreigners Identification Portal (FIP) System hmanga chhinchhiah tum an ni.

Thudawn danin sawrkar laipui chuan Myanmar raltlante chhinchhiah tur hian Mizoram sawrkar chu tum engemaw zat a hriattir tawh a; mahse, Mizoram sawrkar hian chhuanlam eng eng emaw siamin a lo hnar thin a. Sawrkar laipuiin raltlante chhinchiahna tura a ruahman, Embassy Form chu raltlante tan a him lo thei nia sawiin, chhinchhiahna dang hmang turin sawrkar laipui chu a ngen a. Embassy Form-ah hi chuan Myanmar sawrkarin raltlante hming leh nihna a hriat theih vek dawn avangin raltlante tan hian a him lo niin an sawi a ni.

Mizoram sawrkar ngenna hi pawmin sawrkar laipui chuan FIP hmanga chhinchhiah turin ruahmanna a siam leh a, kar kalta Nilaini-a Home Minister K.Sapdanga hova High Level Committee on Displaced Persons (Refugees) thukhawm chuan raltlan chhinchhiah hna hi July, 2025 atang chuan thawh tan nise tiin an rel a. Myanmar raltlan chhinchhiah tur hian Mizoram sawrkar pawh a inbuatsaih fel thawkhat tawh a. June 20, 2025 khan raltlan chhinchhiahna atana tul leh pawimawhte chu National Informatics Centre mi thiamten Mizoram District hrang hranga biometric enrolment hna thawk turte training an pe tawh a. Raltlan chhinchhiah hna hi online kaltlangin portal-ah hian dah zel tum nia hriat a ni.

Mizoram Police hotute chuan Myanmar raltlan chhinchhiah chu a pawimawh tih sawiin, harsatna leh buaipui ngai an awmin an nihna leh awmna hriat zung zung nante a tul hle niin an sawi a. Tuna temporary ID siamsak ringawt chu a tawk zo lo nia sawi bawkin, thenkhat chu phone number an thlak vangin biakpawh theih an ni lo a, a then lut leh chhuak an awm reng bakah awmna hmun sawn an awm reng bawk avangin chiang taka chhinchhiah chu a pawimawh hle tih an sawi bawk.

February 1, 2021-a Myanmar mipui sawrkar paihthlak a nih hnua mi thahnem tak Mizoram-ah an sahimna zawngin an raltlan a. Chhinchhiahna hnuhnung ber, June 24, 2025-ah chuan Mizorama awm mek hi mi 27,751 an ni a, Raltlante chen lailawkna tur, Relief Camp 88 a awm a ni. Hei bakah hian Bangladesh raltlan Mizoram-a awm mek mi 2,371 awm bawkin an tan hian Relief Camp 11 siam a ni a. Manipur raltlan paawh chhinchhiahna hnuhnung berah chuan mi 7,324 an ni a, Relief Camp paruk siam a ni. Mizoram sawrkar chuan Myanmar leh Bangladesh atanga sahimna zawnga Mizoram-a lutte tan Temporary ID a siamsak a, Myanmar mi 27,829 leh Bangladesh mi 477 siamsak tawh an ni a. Temporary ID leh Biometric Enrolment hi thlunzawm tum a ni. Raltlante tan hian sawrkar laipui chuan buhfai leina turin Mizoram sawrkar chu cheng vbc. 5 pein buhfai metric ton 1,379.34 lei-a sem a ni tawh bawk.