Olympic Day Run neih a ni

Mizoram Olympic Association buatsaihin ‘Olympic Day Run’ chu nimin zing khan Aizawl-ah neih a ni a, he hun hi Chief Minister Lalduhoma leh Sports Minister Lalnghinglova Hmar te chuan an telpui a ni.

‘Olympic Day Run’ hi Sikulpuikawn, Vaivakawn leh Chanmari Kawn atanga neiin he huna tel infiammi te chuan Lammual an pankhawm a, Lammual-ah hian a kharna hun hmang Chief Minister Lalduhoma chuan International Olympic Day June ni 23 chu khawvel pumah Olympic Movement leh Sports chawilarna atana hman thin a ni tih sawiin, Infiamna hmanga taksa hrisel zawk nei tur leh infiamna hmanga khawvel tha zawk - inunauna, inzahtawnna, remna leh muanna, intluk-tlanna leh kan chenhona kawnga kan mamawhte chawilar nana hman a ni tih a sawi a. “Kan taksa hi hrisel taka a awm theih nan kan sawizawi that a ngai a, infiamna hi insawizawina tha ber pakhat a ni. Infiammite chu an taksa chauh ni lovin an rilru thlengin a hrisel thin. Tin, hnam hrang, tawng hrang leh Sakhaw hrang pawh ni ila, infiamna hian duh thuhmun min neihtir a, thinlunga inpawh-tawnna te, inunaunate min neihtir thin a ni,” a ti.

Khawvel ram tina infiammite duhthusam chu an ram aiawha Olympic-a inlan a ni thin tih pawh Chief Minister chuan sawiin, India ram aiawha Olympic-a inlan thei Mizo thalai pahnih chiah kan la neih thu a sawi a. “Kan thalaite zingah India aiawh thei khawpa talent nei tha tam tak kan neih kan rin avangin kum 2036 Olympic lo thleng tur khi thlir ranin kan sawrkar chuan Vision 2036 kan kalpui mek a. Kawng hrang hrangin hma kan la dawn a ni,” a ti bawk.

Kumin-a Olympic Day-ah hian thupui atan ‘Move, Learn, Discover - Together for a better world’ tih chu hman a ni a, Olympic Day Run kharna inkhawm hi Mizoram Olympic Association-a President Robert Romawia Royte chuan kai-hruaiin National Games leh NE Games hnuhnung bera Medal la te hnenah lawmman sem a ni bawk.