Aizawl-a FSW zinga 80% Aizawl pawn an ni

Aizawl khawpuia hmeichhe inzuar thin, ‘Female Sex Worker’ (FSW) chhinchhiah zinga 80% vel chu Aizawl khaw pawn, thingtlang lam mi an ni.

Samaritan Society of Mizoram zirchianna atanga a lan danin hmeichhe inzuar thin hi mi 430 an chhinchhiah a, heng zinga 80% vel chu Aizawl pawn an ni a. Heng inzuar thinte hi kum naupang lam an tam ber a, a tlangpuiin kum 18 atanga 45 inkar an ni deuh ber a, chutih laiin kum 50 chung lamte pawh an awm bawk. Aizawl pawn inzuar thin zingah hian Aizawl-a hnathawh tur zawnga kal; mahse, thawh tur mumal hmu lo an tam hle a. Hei bakah hian Aizawla pasal nei; mahse, an inthen leh hnua awmna mumal nei lote an ni tlangpui a ni.

Samaritan Society of Mizoram zirchianna atanga a lan danin hmeichhe inzuar zinga 90% chu chhungkaw mumal lo leh nu leh pa kara seilian lo an ni a. Nu emaw, pa emaw zu in nasa, an nu leh paten an enkawl mumal loh leh ngaihsak loh an ni tlangpui tih tarlan a ni a. Inzuar zingah hian kum 18 atanga 23 inkar tam berin 41% lai an tling a. 6% chu naupan laia khawihchhiat an niin a khawih chhetu hi an chhung hnai leh thian hnaite an ni tlangpui a. Heng inzuarte hian sum emaw, therhlo (zu, drug, thawmhnaw etc.) hmuh nana inzuar an ni tlangpui.

Hmeichhe inzuar zinga 32% hi HIV positive an ni a, hri an kai chhan hi Condom tel lova mipat hmeichhiatna an hman vang a ni tlangpui a. Anmahni dawrtute zingah Condom hmang duh lo, hman aia pawisa pek belh zawk duhte an awm tih tarlan a niin FSW te hian a tlangpuiin ruihhlo engemaw ber Zu, Ganja, Heroin, Pills emaw an khawih thin tih zirchianna chuan a tarlang bawk.