UD&PA in ‘Women for Trees’ an kalpui tan mek

Ministry of Housing and Urban Affairs, Govt. of India hnuaia AMRUT Mitra Initiative (AMRUT 2.0 in convergence with DAY NULM)-a ‘Ek Ped Maa Ke Nam’ campaign kal zelah Thingphun Campaign, ‘Women for Trees’ chu nimin atang khan Aizawl leh District khawpui-ah te kalpui tan a ni.

Urban Development & Poverty Alleviation Department bultuma he hmalakna hi Serchhip-ah pawh nimin khan kalpui tan a ni a, nimin khan thingtiak phunna tur hmun 4- School 2 bakah Park pakhat leh sawrkar hmun pakhat te chu thlanfel a ni. ‘Women for Trees’ campaign-in a tum ber chu hmeichhe Self Help Group (SHG)-te kaihhruaina hnuaiah thing a tam thei ang ber phun a ni a. Khawpui chhunga boruak thianghlim leh tuihna tha zawk kan neih theih nan thingphun theihna tura ram awl awm thei apiang; tui hna awmna bul hnai, Park, Sawrkar ram leh a vel, School/College, Anganwadi-ah te thingphun campaign hi kalpui tura ruahman a ni a. Thingphun te hi a rei lo berah kum hnih khat tal enkawl chhunzawm tur a ni ang.

He hmalakna hi thawh thum-a kalpui tur a ni a, May 21 atanga 23 chhungin thing phunna tur hmun thlanfel tur a ni a, Junr 5 atanga August 31 chhungin thingtiak phun tur niin kum khat atanga kum hnih chhung chu thingphunte enkawl chhunzawm hun chhung atan hman a ni anga. UD&PA Department thawktute kaihhruainain Mizoram-a hmun 46-ah SHG member 518-ten thing engemaw zat phun turin hma an la a ni.