Indian Railway Catering & Tourism Corporation leh Mizoram sawrkar in thawhdun an tum

Indian Railway Catering & Tourism Corporation (IRCTC) hotute chuan Mizoram-a Tourism ti hmasawn turin Mizoram sawrkar nen an thawkho dawn tih an sawi.

Nimin-a Aizawl Press Club-a chanchinbumite an kawmnaah he thu hi sawiin IRCTC hotute chuan Mizoram sawrkara Tourism Department Director nen thawhdunna Memorandum of Understanding (MoU) ziah an tum thu leh kar thar lo awm turah chuan tihfel an tum thu an sawi a. Inremna hi ziah a nih chuan India hmarchhaka khualzin tam zawk an lo luh zel theihna tura mellung pawimawh tak a nih dawn thu an sawi a. Mizorama Rel a lo luh huna Rel-a ei leh in leh khualzin chinfel te, ticket buaipui te anmahni kut a nih dawn thu an sawi bawk a ni. 

IRCTC hotute chuan Mizoram-a khualzin hruai luh mai bakah mipuite tana remchang tak tur zin theihna programme tha tak tak an neih thu leh man man takin ram hrang hrang tlawh theihna tur Tour Package hrang hrang an neih thu an sawi a.  Kristian Sakhua vuantute tana hmun pawimawh hrang hrang Korinth, Thessalonika, Athens, Rome leh adangte tlawha an zin pui thin thu te pawh an sawi bakah Nepal, Bhutan, Thailand, Singapore, Malaysia, Vietnam leh Europe ram hrang hrangte pawh Mizo khualzinte'n awlsam zawka an tlawh theihnân hma an la dawn tih an sawi bawk.

IRCTC hi Ministry of Railways hnuaia Indian Railways peng pakhat niin Rel chhung leh Station-a ei leh in buaipui bakah ramchhung leh ram pawna khualzin buaipui hna te an thawk a ni.