Serchhip-a Solid Waste Management kal zelna tura pawimawh sawihona neih a ni

New Serchhip Lungrual ram-a Plastic Waste Management Centre-ah nimin khan Solid Waste Management kal zelna tur chungchanga PHE Department leh UD&PA Department thawdunna tur sawihona neih a ni a. He hmalakna hnuaia Serchhip-a inzirtirna kalpui dan turte pawh sawiho a ni bawk.

He sawihona hun hi PHE Department-a Engineer-in-Chief, Er. H. Duhkima chuan kaihruaiin Central Sawrkar atanga hnathawh tur lo kalte Convergence-a thawh tura ruahman deuh vek a nih thu leh chu chuan engemaw chenah harsatna a thlen thin thu a sawi a, a bik takin Funding chungchangah harsatna a tam thin thu a sawi a. Chutih mek lai chuan Department pahnih ten thawhhona tha an neih chuan hna tha taka a kal theih thu leh hmasawnna lian tak thlen thei a nih thu a sawi a. PHE Department leh Rural VC ten bawlhhlawh sawngbawlna kawngah hian thawhhona thuthlung an neih tawh thu te, bawlhhlawh khawn chungchangah te leh Fee lak danah te inremna siam a nih tawh thu a sawi bawk a. Green Herd SP te leh PHE Department ten inremmna an siam zui thu pawh sawiin, Green Herd SP te hian chak taka hma la zuiin tunah hian Plastic bawlhhlawh sawngbawl hna an thawh tan theih tep thu leh hemi atana mamawh khawl hrang hrangte pawh a hmunah bun fel a nih tawh thu a sawi bawk.

Er. H. Duhkima chuan PHED leh UD&PA te chuan Bawlhhlawh sawngbawlna hmun inngheng renga an neih dawn avangin thawkho lo thei lo an nih thu sawiin, kalkawng, tui leh power supply-ah te thawhho ngai an nih thu a sawi a, heng bakah hian kawng hrang hrangah inlungrual taka an thawhho ngei a beisei thu a sawi a. UD&PA lam te pawhin an motor te phal taka an hmantir theih tur thu an sawi avangin lawmthu a sawi bawk.

He hunah hian Bawrhsap Paul L. Khuma pawhin Serchhip mipuite hnenah nasa zawka Awareness campaign neih a la tul thu te, Department hran atanga funding kal hun inang lo avanga harsatna awm thei a nih avangin Department pahnih ten hemi atan a an sum hmuhte Green Herd SP Private Agency-ah chhunluh zel thaa a hriat thu te a sawi bawk a ni.

He huna tel te hian Solid Waste sawngbawl chungchanga an tawnhriat leh an hmathlir hrang hrangte sawiin, invenna tur leh hmasawnna tur hrang hrang ngaihthlak a ni a. PHED leh UD&PA Department te bakah Green Herd SP leh VC te tangkawpin Serchhip-a Awareness campaign ngawr takin kalpui se, Solid Waste Management hmun te hi Private Firm te nen Agreement mumal tak siama enkawl tir chungchangte leh a theih ang anga heng Private Firm tih-changtlung dan tur an relte chu State Level Meeting-ah thlen nise an ti bawk.