Home leh Centre tan buhfai-ah thawhdun tum

Welfare Institutions & Hostel Scheme (WI&HS) kaltlanga Mizoram-a Welfare Institutions, a bikin sawrkar Dan zawma din De-addiction leh Rehabilitation Centre te hnena buhfai man tlawma pek thin chungchang ah SWWCD leh FCS&CA Department te chuan nimin khan thawhdunna thuthlung an ziak.

Mizoram-ah hian Welfare Institutions 116 leh Hostels 87, a vaiin 203 a awm mek a, heng ah hian mi 14748 awm mekin anni pual hian Central Sawrkar atangin mi pakhat tan thla khatah buhfai kg. 15 zel chu kg. ah Rs. 6 rate a dawn thin a ni a. He buhfai hi sawrkar laipuiin thla 6 (ruk) danah a pe thin a ni. Tunhnaiah sawrkar laipuiin he scheme hnuaia buhfai kan dawn theihna tura tih tur thar a siam awmin, ni danga Utilization Certificate thawn mai thin bakah CALLOC portal information upload te, audit report te leh Welfare Institutions leh Hostel te an lo enfiah ve theihna tur department weblink thawn te a ngai thar a. October-March, 2024-2025 tana allocation dilna thehluh hnuah hei hi rawn hriattir a nih avangin buhfai hi hmuh a ni ta rih lo a ni.

Nimin-a thawhdunna an ziah atang hian Buhfai man tlawm sawrkar laipui atanga dawn khat a nih avanga harsatna phuhru turin FCS&CA Department in thla tina an quota advance-a an dawn theihna turin rem a ruat ang a, June 2025 atangin thla quota a advance-a pein Sawrkar laipui atanga quota a lo then hunah siamrem tur a ni ang.