Sports Minister in Medal la te lawmpuina a hlan

Sports Minister Lalnghinglova Hmar chuan Khelo India Youth Games 2025 neih zawh taka Boxing-a Gold Medal latu Samuel Zadeng leh Football (Boys) a Bronze Medal latu Mizoram Team te lawmpuina hun nimin khan a buatsaih.

May 4 atanga ni 15 inkara Patna, Bihar-a neih zawh tak ‘Khelo India Youth Games’ a Medal latute lawmpuina Sports Minister Pisa-a neih ah hian Minister chuan National Level-ah Medal lak a harsat thu sawiin, hetianga Medal an la thei chu lawmawm a tih thu a sawi a. “Sports hmasawnna chu sports person-ah a lang tur a ni a, Medal lak dan zel an en avangin Medal lak hi a pawimawh a ni,” a ti.

Khelo India Youth Games 2025 neih zawh takah hian Bawngkawn Brigade rawlthar Samuel Zadeng s/o ZD. Lalremsanga hian kg 65-70 huangah khelin Final-ah Uttar Pradesh boxer Praveen Yadav chu 5-0 a hnehin Gold Medal a la a, Samuel-a hnenah hian Minister hian Boxing infiamna bungrua hlanin ama mimal pawisa a pe bawk a, August ni 29-a Incentive Cash Award sem hunah Medal la te hi pawisafai hlan an ni ang.

Khelo India Youth Games 2025-ah hian Mizoram atangin Sports discipline pasarihah infiammi 34 leh anmahni hruaitu mi 10 an tel a, State leh UT 36 intihsiak zingah 26-na an ni. Kuminah hian E-Sports chu demonstration sports a telh thar a ni a, Mizoram atang pawhin mi 13 an tel a ni.