Social Welfare Minister in OKM leh TBCC hotute kawmin an kal zel dan tur a sawipui

Social Welfare Minister Lalrinpuii chuan nimin khan a Pisa-ah Operation Kingdom Ministry (OKM) hotute kawmin Tawngtai Bethel Camping Centre (TBCC) Founder Zohmingthanga leh TBCC Advisory Board hotute a kawm bawk.

OKM hi Phunchawng-ah inbengbelin ruihhlo ngaite Pathian thu zirtirna an kalpui thin a, tunah hian mi 400 vel awm mekin Course khat hi thla 7 leh thla 8 vel a ni thin a ni. OKM hian inkaihhruaina felfai tak neiin ruihhlo ngai sim tawhte chu Senior Resident atangin Worker-ah an dah thin a, chuta tangin Executive ah leh OB-ah te an tang chho leh a, an chungah hian Adviser te an awm leh bawk a. Firms & Societies Act hnuaiah in register in mi inphalte donation pekkhawm atanga kal an ni ber a. Anmahni zirlaite hi a huho-a inhlawhin Insakna hna hrang hrangte, kawng siamna ah te, lungrem hnate an thawk thin, hei bakah hian Vawk leh ar an vulh bakah thlai huan te an siam bawk a ni.

Social Welfare Minister hian nimin vek khan a Pisa-ah TBCC Founder Zohmingthanga leh TBCC Advisory Board hotute chu a kawm bawk a, tha zawk, langtlang zawk leh inkaihhruaina mumal zawk nena TBCC kalpui dan tur an sawiho a. TBCC hotute lam pawh hian dan hnuaia mumal taka kal chu an duhdan anih thu leh lawmawm an tih thu an sawi a. Ruihhlo ngai hawna tur nei lova khawlai a tei rawlai te a rang thei ang bera lo enkawl leh turin TBCC hi ruahmanna siampui a ni a. Admission mumal zawka tih leh a hmunhma in a zawh tawk damlo la turin an inruahman dawn a. TBCC Advisory Board-a tel Vanhela Pachuau Chairman-na hnuaiah uluk zawkin an vil tawh dawn bawk a ni.

Sawrkar chuan Ruihhlo ngai te enkawlna hmun hi dan angin accreditation a kalpui tawh dawn a, chu Dan hnuaia Minimum Standards zawm tur awmte an zawm theih nan Sawrkarin Center te training pek leh kawng hrang hranga puih a tum thu leh Kohhran hrang hrang hruaitute pawh pui tura sawm an nih thu Minister hian OKM leh TBCC hotute hi a lo hrilh a. Anni lam pawhin Dan hnuaia inkaihhruaina mumal tak nena kal a ni tur chu an lawm thu leh Sawrkar, Kohhran leh NGO te nena thawh tlan chu an duhthusam anih thu an sawi a ni.