Mualkhang Gas Botling Plant cheithat mek Supply Minister in a hmunah a tlawh

Supply Minister B. Lalchhanzova chuan nimin khan Mualkhang-a Gas Bottling Plant Construction Site leh Sairang Dinthar Veng-a Buhfai Godown sak mek te tlawhin Gas Metric Ton 900 dah theihna tura ruahman Mualkhang Gas Bottling Plant hi December 2027 a zawhfel tura ruahman a ni.

Mualkhang Gas Bottling Plant a tlawhna ah hian Supply Minister chuan he Bottling Plant hi kum 2006 khan Rajiv Ghandhi Five Year Plan hnuaiah Indian Oil Corporation Limited (IOCL) kaltlanga din a ni tih sawiin, tangkai taka hman niin nitin Gas bur 2500 vel helai hmun atang hian pekchhuah thin a ni tih a sawi a. January ni 20, 2020 khan Mualkhang Gas Botling Plant hi tihtawp a nih thu leh a chhan ber chu Gas Bullet (Gas dahkhawlna thir bawm) te chu a thir a pan tak avangin Petroleum Explosive Safety Organisation (PESO) lamin hman chhunzawm phalna an pek an tihtawp tak vang a ni tih a sawi a. Mualkhang Gas Botling Plant tharthawh leh a nih theih nan Mizoram Sawrkar chuan theihtawpin hma a lak thu leh helai hmun din thar leh nan hian IOCL chuan cheng vbc. 225.71 saunction in January 2025 atangin hna tan a ni tih a sawi a, December 2027-a zawhfel tura ruahman niin zawhfel a nih hunah chuan nitin Gas bur 7500 vel helai hmun atang hian pekchhuah theih beisei a ni tih a sawi.

Supply Minister chuan helai hmun atana IOC lamin ram an mamawh belh 1.8 Hectres pawh Revenue Department in rang taka ngaihtuah sakin, February 2024 khan Land Lease siamfel a ni tih a sawi bawk.

Mualkhang Gas Bottling Plant-a Divisional General Manager Z. Lhungdim-a'n a sawi danin a hmaa helai hmun atanga ni khat-a eirawng-bawlna Gas bur 2500 vel an siam thin kha tuna mi peihfel a nih hunah chuan bur (cylinder) 7500 vel siamchhuah theih a ni dawn a ni.

Minister hian Sairang Dinthar Veng-a Supply Department in Buhfai Kudam pathum an sak mek, July ni 17, 2025 a zawh tura ruahman chu a hmunah a tlawh bawk a. Heng Godown pathum sak nan hian NABARD atangin cheng nuai 440 leh SASCI atangin cheng nuai 971 hmuh niin buhfai quintal 35000 leng tura ruahman a ni.