Mizoram Transformation Movement (MTM) din a ni

Mizoram-ah danglamna (transformation) a thlen theihna tura a tul anga hma la turin nimin khan pawl thar, Mizoram Transformation Movement (MTM) chu Aizawl-a Donum Dei Restaurant-ah tlangzarh a ni.

MTM Tlangzarhna hun hi an pawl Vice President Laldingluaia chuan a kaihruai a, he pawl thar hian ‘Mizoram hi ram intodelh, hmasawn leh Pathian tih ram a siam’ tih chu hmathlir (vision) atan neiin thil tum (mission) pali a nei a, chung te chu Mizoram-ah hmasawnna tluantling thlen; Chhungkaw tin hmasawnna thlen; Ram leh Hnam humhalh leh Sawrkar tha a awm theihna tura hmalak tih te a ni a. Isaia 60:1 ‘Tho la, eng rawh’ tih chu Bible chang innghahna atan an hmang bawk a ni.

He pawl-ah hian hruaitu tur pawh siam nghal niin President-ah Dr. Lalbiakmawia Ngente (Bungkawn); Vice President-ah Laldingluaia (Sihphir); General Secretary-ah Dr. Vanlalsiama Chhangte (Zotlang); Asst. Gen. Secretary-ah Romalsawma @Roma (Mission Vengthlang) Joint Secretary-ah F. Zothanzuala (Zotlang) leh Treasurer-ah Lalrinawmi Pachuau (Zarkawt) te an ni.