Lungsen Block-ah Project BLOOM kalpui tum a ni

Lunglei District Deputy Commissioner (Bawrhsap) hma aknaa Lungsen Aspirational Block huamchhunga nu leh naupangte hriselna leh chawikanna kawnga beihpui thlakna tur, Project BLOOM (Beter Living through Outreach, Optimal Maternal & Child Health) kalpui tur chu nimin khan Lunglei-ah Bawrhsap Navneet Mann-i hovin sawiho a ni a. NITI Aayog hnuaia Aspirational Block Programme-in hriselna leh chaw tha (health & nutrition) chungchanga hmasawnna tehfung atana thlan bik, Key Performance Indicator (KPI) a duan hrang hrangah Lungsen Block-in hma a sawn theihna tur leh zaa za (100%) tihhlawhtlin a nih theihna atan Project BLOOM hi ruahman niin, raipuarte a hun taka chhinchhiah (register) an nih a, chaw tha (supplementary nutrition) pawh tha taka an dawn theih nan leh damdawi In-ah ngei nau an neih theih nan te, nausen leh naupangte'n an thanlenna atana mamawh khawp chawtha an hmuh a, an lo hrisel zel theih nan leh nu leh naupangte tana sawrkar ruahmanna hrang hrang awmte a chhawr turte'n an hriata an chhawr ngei theih nan te hmalak tum a ni.

Project BLOOM hi June thla tirah kalpui tan (launch) tura ruahman niin, a hawnna hi Primary Health Centre (PHC) Lungsen-ah buatsaih a ni dawn a. He Project hnuaiah hian Block Development Officer (BDO) Lungsen kaihhruaina hnuaiah Child Development Project Officer (CDPO) Lungsen leh Medical Officer (MO), PHC Lungsen te'n a tam thei ang ber Campaign leh Awareness kalpui turin ruahmanna lo siam se an ti a. District Immunisation Officer (DIO), Lunglei chuan Lungsen Block chhunga hri danna (immunisation) pek dan tur ruahmanna siamin, hri danna pek kawngah leh hriselna chungchangah hmasawnna a awm zel theih nan hmalak nise an ti bawk a. Raipuar an nau pai atanga thla thum chhunga inziak lut (register)-te hnena pek atan Special Gift Basket chu he project pual hian buatsaih tum a ni bawk.