Lunglei District-ah kawng dinhmun thlirho a ni

Nimin khan Lunglei-ah Bawrhsap Navneet Mann-i hovin National Highway 54A leh 302 (Hrangchalkawn - Tlabung) kawngpui leh National Highway 54 (Aizawl - Tuipang) kawngpui laihzauh hna leh siam that hna thawh mek dinhmun leh lirthei tlan dan ruahmanna sawiho a ni.

He thutkhawm ah hian NHIDCL hotute leh a kaihhnawih sawrkar Department hrang hrang bakah Contractor leh Lunglei Maxi Cab Owners Association aiawhte an tel a. National Highway 54A & 302 (Hrangchalkawn - Tlabung) ah hian 3-Gate, Sazaikawn huamchhunga kawng laih tharna hmuna lung leh lei tla mai thei hmun hrang hranga awmte chu a rang thei ang bera enfiah tur leh chhiatna a thlen palh lohna tura hai fai turin contractor-te chu hriattir an ni a. Leivung paih avanga harsatna thleng mekte chu Contractor-te'n leivung dawlna tur an siam loh avang leh leivung paihna hmun tura an paih loh avang nia ngaih niin hei hi khauh lehzuala enzui tum a ni bawk.

He hunah hian NH-54 (Aizawl - Tuipang) leh NH-302 (Lunglei - Tlabung) kawng laih mek dinhmun tarlan niin, kawng laitute'n harsatna an tawhte an tarlan bakah, ram neitute atanga harsatna awmte thlirho a ni bawk a. Kawng laitute chu Fur lo thleng tur atan harsatna leh chhiatna a thlen loh nan tha taka inbuatsaih tura hriattir an ni a, harsatna an neihte chu thuneitute hnenah thlen vat thin tura tih an ni. He hunah hian kawng siamtute chuan tun dinhmuna an hna thawh dan leh hna thawh dan tur hmachhawp an neihte tar langin, Lungsen leh Tlabung inkar kawng laih hna 90% leh Sazaikawn leh Lungsen inkar kawng laih hna 70% thawh zawh a nih tawh thu an sawi a ni.