Larsap hovin Ephatha Special School for the Deaf and Hard of Hearing dinchamphaphak lawm a ni

Ephatha Society of Mizoram for the Deaf and Hard of Hearing (ESOMDHH) buatsaih Ephatha Special School for the Deaf and Hard of Hearing dinchamphaphak vawi 9-na lawmna chu nimin khan Aizawl College Veng-ah neih a ni a, he hun hi Governor General (Dr) Vijay Kumar Singh chuan khuallian niin a hmanpui a ni.

Larsap chuan he hun a hmanpui thei chu lawmawm a tih thu sawiin, tun hun thleng thei tura Society hotute, thawktute leh nu leh pa te hmalakna chu fakawm a tih thu a sawi a, “Nitin in Classroom-ah thiamna, dawhtheihna leh ngilneihna in lantir bakah naupangte inrintawkna leh hlimna pein an theihna inthup in haichhuah sak thin a, in inpekna leh rawngbawlna ngaihhlutawm tak hi ka chhuang hle a ni,” a ti a. Bengngawng leh ri hriatna tha lo naupangte pual liau liaua Mizorama School awmchhun chu Mizoram tana meichher eng chhawmnungtu leh, hmangaihna leh thawhrimna hmanga hlawhtlinna a hmuh theih a ni tih lantirtu a nih thu a sawi bawk.

Larsap chuan Vohbik naupangte enkawl kawngah Inchhung khura inenkawlna in awmze thui tak a nei tih sawiin, hmangaihna leh an laka beiseina sang tak chuan naupangte chakna a pe a, harsatnate paltlangin duhthusam an thleng thei thin tih a sawi a. Nu leh pate chu fate hmalam hun atana mi pawimawh bik an nih avangin zirna tha an dawn theih nana theihtawp chhuah tura chahin, Sawrkarin mitin huapzo zirna a kalpui mek hnuaiah zirna tibahlah thei ang chi reng reng a awm loh nana hmalak a nih thu a sawo a, hemi kawnga Ephatha Special School for the Deaf and Hard of Hearing-te hmalakna chu mitin huapzo zirna a taka tichiangtu a nih thu a sawi a. Larsap chuan an dinchhan tihlawhtling turin a theihna zawn apiangah puih a inhuam thu pawh sawiin, kalkhawmte chu Ephatha Special School for the Deaf and Hard of Hearing hmasawn zel nana theihtawp chhuah zel turin a chah a ni.

Ephatha Special School for the Deaf and Hard of Hearing hi May ni 11, 2016 khan din a ni a, tun dinhmunah Principal 1, Teacher 5, Craft Teacher 1 leh Volunteer pakhat te'n zirlai 24 an enkawl mek a. Class I atanga VIII thleng zirna awmin, Indian Sign Language (ISL) hmanga zirna kalpui a ni a. School dintu Ephatha Society of Mizoram for the Deaf and Hard of Hearing (ESOMDHH) hi bengngawng leh ri hriatna tha lote hamthatna ngaihtuahtu Society ni turin February ni 28, 2012 khan din a ni. Nimin-a he hun hman ah hian School Principal Samuel R. Lalhmangaiha chuan report pein Laldikkimi, Senior Adviser, ESOMDHH-in thu a sawi bakah zirlai naupangte'n an thiamthil chi hrang hrang an entir bawk a. Zirtirtu kal tha lawmman chu Larsap-in a hlan bawk a ni.