Hualtu ram atanga Aizawl-a tuilakna hawn a ni

Public Health Engineering Department changtu Minister Prof. Lalnilawma chuan nimin khan 'Alternate Gravity Water Supply Scheme of Aizawl' chu Muallungthu-ah a hawng.

He Project hi NESIDS funding hnuaiah cheng vbc. 117.3035 seng a siam a ni a, a hna hi KRAM Infracon Pv.t leh Vikas Associates te tangkawp thawh a ni. He project-ah hian tui litre vbc. 248 dawng tuikhuah 'Earthen Dam' chu Hualtu ram chhunga Dilzawl hmunah siam a ni a, Tui hi sawngbawl a nih hnuah mm 450-a lian pipe KM 39-a sei hmangin Muallungthu tlang-a tui dahkhawlna (Reservoir), tui litre nuai 15 khawl theihna ah chhunluh a ni a. Muallungthu ram Khumtung peng atang hian tui 3 Million Litre per Day (MLD) hi pipe 200 mm a lian hmangin KM 13-a thui pipe hmangin Trinity Hospital bul thleng luang phei lehin helai ah hian lak pen leh a ni a. Mualpui lamah 2 MLD leh Mission Vengthlang lamah 1 MLD chhunluh leh tur a ni anga. A pipeline zawng zawng thui zawng hi KM 66 a ni. 

NESIDS OTRI hnuaia hmalakna 'Alternate Gravity Water Supply Scheme of Aizawl' hawnna hunah hian PHE Minister chuan kum 2018 atanga kum 2025 thlenga Sawrkarna siamtu party pathum leh PHE Department-a thawktute thahnemngaihna leh inpekna avanga Project hlawhtlinna kan hmu thei chu lawmawm a tih thu sawiin, Khawl leh kawlphetha rin ngai lova awi tlan behchhana tui lakkhawl leh sem theih tura ruahmanna chuan inrenchemna kawngah nasa takin hmasawnna a thlen ngei a beisei thu a sawi a. 'Alternate Gravity Water Supply Scheme of Aizawl' hawng thei tura hmalakna kawng a thui zia leh harsatna hrang hrang paltlang a nih thu Minister chuan sawiin, he hlawhtlinna chang thei tura inlungrual taka tanrualna leh thawhhona nen hmalakna kalpui a ni chu thawktute fakawm a tih thu a sawi a. Tui chu khawtlang hrisel nan leh hmasawn nana thil pawimawh berte zing ami a nih angin he scheme hawnna hian Muallungthu leh a chhevel khawtlangah hmasawnna hmel thar a thlen tir ngei a beisei thu a sawi bawk.

Nimin-a he hun hman hi PHE changtu Secretary Teresy Vanlal-hruaii chuan kaihruaiin Er. Zodinthari, CE Zone-I chuan Technical report a pe a, Aizawl South-III Bialtu MLA Baryl Vanneihsangi pwhin Muallungthu leh a chhevel khua chawmtu tur 'Alternate Gravity Water Supply Scheme of Aizawl' hawn a ni ta chu lawmawm a tih thu a sawi a. Hmasawnna rotling a awm zel theih nan beiseina sang tak neih a pawimawh thu leh chu beiseina tihlawhtling tura taimakna neih a pawimawh bawk thu a sawi a. He hmalakna hlawhtlin nana a sulsutu leh hmalatu department-a thawktute leh a hmun petu, Muallungthu khawtlangte chungah lawmthu a sawi bawk a ni.