HSLC leh HSSLC Exam-a titha hmeichhia te lawmpui

Kumin-a High School Leaving Certificate (HSLC) leh Higher Secondary School Leaving Certificate (HSSLC) Exam-a Top 10-a tling hmeichhe naupangte lawmpuina hun chu nimin khan Aizawl-a I&PR Office Lianchhiari Run-ah neih a ni.

State Hub for Empowerment of Women (SHEW), Women & Child Development (WCD) bultuma hmeichhia zirlai tithate lawmpuina hun hi Social Welfare, Women & Child Development (SWWCD) changtu Minister Lalrinpuii chuan khuallian nia hmanpuiin zirlaite chu an kal zelnaah midangte nun tidanglam thei tura zirna thiltihtheihna tilangtu ni turin a chah a, tuna an hlawh-tlinna chan hi a bultanna mai a ni tih hre reng chunga hlawhtlinna tam zawk leh dinhmun sang zawk la luah chho tur chuan tha thlah lova rinawm taka beih tang ang a tul thu a sawi a ni.

Hmeichhe naupang, Zirna leh Sports lam thiam bikte chawimawina hun hi Beti Bachao Beti Padhao (BBBP) Scheme kaltlangin kumtin neih thin a ni a. BBBP Scheme in a tum ber chu Save the Girl Child, Educate the Girl Child tih niin, Mizo tawng chuan ‘Hmeichhe naupang chhanhim la, zirtirna tha pe rawh’ tihna a ni a. Nimin-a he hun hman ah hian kumin-a HSLC leh HSSLC Exam-a zirlai hmeichhia tithate hnenah Minister hian chawimawina thilpek hlanin pawisafai bakah Certificate a keng tel a ni.

Kumin-a HSLC Exam result chhuak ta ah khan Top 10-a tling an vaiin mi 24 an awm a, an zingah hian hmeichhia 10 an awm a, HSSLC-ah hian Arts-ah Top 10-ah mi 16 langin an zinga mi 9 te chu hmeichhia an ni a, Science-ah mi 15 langin an zingah hmeichhia 6 an awm bakah Commerce-a Top 10-a lang mi sawm (10) zinga 5 chu hmeichhia an ni a, HSLC leh HSSLC Exam-a Top 10-a hmeichhe naupang lang hi an vaiin mi 30 an ni.