ZPM sawrkar in sawrkar hnathawk a vau nasa niin sawi

MNF General Hqrs. a Treasurer Lalruatkima chuan ZPM Sawrkarin kawngtin rengin sawrkar hnathawkte an vau nasa nia sawiin, chu chuan nawrhna a hring mek niin a sawi.

Inrinni khan Hnahthial-a Mizo Hnam Run-ah Village Council 2025 inthlana MNF Candidate tlingte lawmpuina leh chawimawina (Citation) hlanna hun hman niin he hun a hmanpuina ah hian MNF Treasurer Lalruatkima chuan “ZPM Sawrkarin kawng tinreng in sawrkar hnathawkte an vau nasa a, chu chuan nawrhna a hring mek a ni. Inthlan dawn kuma nuar thinte chuan tun atangin lungawi lohna an lantir a, hei ti thil mak a tling. Chu chuan ZPM sawrkar chu sawrkar hnathawk ten an rintâwk loh zia a lantir a ni,” a ti a. ZPM sawrkar chu sawrkar hnathawkte vau ching leh pawl dangte diriam ching an nih thu sawiin, “CSS hnuai thawkte nawrh pawh nu leh pa chan chang loin an vau nghal a. Universal Health Care pawh Private Hospital pakhat mahin inremna (MOU) an la sign pui duh duh lo. Sawrkar hnathawk inzawmkhawm pawlin an dodal bawk. Heng inrem lohna awm te hi dawhkan khat kila sawi fel tum aiin ZPM sawrkar chuan vauna leh tihelna nen, runluih chungin an chawk hnawk zawk a ni,” a ti.

MNF Treasurer chuan MNF sawrkar hnuaiah mipui an himin an hlim bawk tih sawiin, “Buhfai leh Gas kan hnianghnar a, Kawngpui pawh kan thuam tha. Ramri Issue-ah pawh MNF aia ti tha an awm lo. Manipur leh Myanmar raltlan te chungchangah pawh MNF sawrkar chuan Home Ministry thu a hnial kalh a, a tul chuan kan dodal mai zel. Chu chuan kan ram, kan hnam, kan sakhaw humhimna tura Party ding awmchhun a nihzia min hriattir a. MNF chuan Zohnahthlak te kan kuangkuah thei vek, mah se, hnam bil ang zawnga inlakhran erawh chu kan rem ti lo a ni,” a ti bawk.

Hnahthial District chhungah VC tam tak an la thei chu Pathian remruat a nih thu leh chu chu kum 2028-a an sawrkar lehna tura hmasialtu a nih a rin thu pawh Lalruatkima chuan sawiin, “A hun pangngai ang chuan October 2025 velah Village Council inthlan buatsaih tur a ni a. Nimahsela, a hun pangngaia inthlan an buatsaih ngam loh avangin chhuanlam tur zawng chawpin inthlan hun thla 6-in an sawn hma a. A hun takah chuan inthlang ila, ZPM hian VC-ah sawrkarna tih tham an la lo ang,” a ti a. MNF awrkar pawisa hnutchhiah cheng vbc. 110 chu ‘Thlai thar lei nan kan dahtha’ an ti nia sawiin, “Tunah Sawhthing lei nan vbc. 36 vel chauh an hmang a. A la chuang cheng vbc. 74 hi a rang lamin Sawhthing lei nan hmang rawh se, tunah chuan an chawh sa a ro tan a, a then a chawr a. A hlawk loh hun nghah chhuah kher hi ZPM sawrkar thil tih vanduaithlak tak a ni,” a ti bawk.