Ramri hrulah Status-quo vawn chhunzawm an remti

Mizoram leh Assam ramri chungchang sawiho a State pahnih aiawh thukhawm te chuan ramri hrulah Status-quo vawn chhunzawm an remti.

Mizoram Sawrkar leh Assam Sawrkar aiawhte hian Zirtawpni khan ramri chungchanga inbiakna, Secretary Level Official Talk chu Guwahat Rohika AAU- International Guest House-ah an nei a, hetah hian Mizoram aiawhte chuan Assam lamin ramri hrula hmalakna hrang hrang an neih thin chu ramri boruak ti tha lo thei anih avangin hmala chhunzawm tawh lo turin an ngen a. Inbiaknaah hian Mizoram-in ramri atana a pawm 1875 Notification kaihhnawiha Assam hnena kum 2023, February ni 13 leh November ni 28-a lehkha an thawnte chu uluk tak leh chipchiar taka sawiho a ni a, 1875 Notification-in a huam chin ram chungchang te, khaw hrang hrang awm dan Mizoram-in Assam hnena a pek tawhte sawiho niin Assam hian Mizoram Sawrkar lehkha kum 2023, November ni 28-a thawn chhanna chu mumal takin a hma lamin thawn se, chumi hnuah Official Level Meeting-ah sawiho leh ni se, an ti a. Official Level Meeting hi hun remchang hmasa ah Mizoram-ah neih leh thuai nise, Mizoram leh Assam ramri buaina chingfel turin boruak tha tak hnuaiah sawiho a hmalak zel ni e an ti a ni.

Inbiaknaah hian Mizoram aiawhte chu Home Secretary Vanlalmawia hovin Official 7 an ni a, Assam aiawhte chu Border Protection and Development Secretary, Prabhati Thaosen hovin mi 6 an ni a, Cachar, Hailakandi leh Sribhumi DC ten Video Conferencing hmangin an lo zawm bawk a ni.