MBSE in HSLC Exam Result a tichhuah ah Mizoram pumah za zela 76.68 in an pass

Mizoram Board of School Education (MBSE) chuan pawl 10 zirlaite tana kumin-a High School Leaving Certificate (HSLC) Exam a buatsaih result chu nimin khan tichhuakin Exam zawng zawng zinga zaa 76.68 in an pass a, nikum aiin zirlai pass tha zawkin nikum khan zirlai za zela 73.37 an pass a ni.

Mizoram Board of School Education-in kumin a HSLC Exam Result a tihchhuah tak atanga a lan danin kumin hian zirlai Exam tura inziaklut 19,303 zingah Exam lo 357 awmin zirlai mipa 8875 leh Hmeichhia 10071, an vaiin 18946 ten Exam hi an hmachhawn a, an zinga zirlai mipa 6910 leh hmeichhia 7617, an vaiin 14,527 ten pass in zirlai Exam zawng zawng atanga chhutin za zela 14527 ten an pass a, zirlai 64 ten Compartmental chanve neiin zirlai 4355 te erawh an Fail thung a ni. Kumin-a HSLC Result chhuak ah hian Distinction-a pass zirlai 1343 awmin 1st Division-a pass 3763, 2nd Division-a pass 5785 leh 3rd Division-a pass 3636 an awm a ni.

Kumin a HSLC Result chhuakah hian a pumpui-ah PC. Lalthakimi D/o Darthuama, KD High School, Aizawl chuan mark 500-ah Mark 479 hmuin pakhatna a ni a, Isak MS. Dawngkima S/o R. Lalropeka, Govt. Mizo High School, Aizawl leh Malsawmkima Chawngthu S/o Zarzoliana, CLS Academy Aizawl-te chuan mark 475 hmuin pahnihna an ni a, Ricky Lalnunfela S/o Lalropuia, St. Joseph Higher Secondary School chuan Mark 474 hmuin pathumna a ni bawk. Kumin hian Top 10-ah zirlai naupang 24 langin Aizawl khawpui pawnlam zirlai pakhat chauh a lang a, St. Paul's Higher Secondary School, Aizawl chu Top 10-ah lang tam berin zirlai 9 an lang a, St. Joseph Higher Secondary School, Aizawl in dawtin zirlai 8 an lang bawk a, Moutn Carmel School, Aizawl atangin mi pahnih langin KD High School, Aizawl ; Govt. Mizo High School, Aizawl; CLS Academy, Aizawl; Greenland HSS Aizawl leh Baptist HSSl, Serkawn atangin zirlai pakhat theuh an lang bawk a ni.

Tun tuma HSLC Result chhuak ah hian School 107-ah zirlai Exam zawng zawng pass vekin School 13-ah an candidate-te an fail vek thung. District malah Aizawl District atangin pass tam berin Lawngtlai District-ah pass percentage a hniam ber thung a. Deficit School-ah za zela 92.68 an pass laiin Govt. School-ah 68.01% an pass a, Subject mal-ah SS-a Fail tam berin 3786 zet an fail a ni.